काठमाडौँ । राष्ट्रिय जनमोर्चा ओखलढुङ्गा जिल्ला समितिका अध्यक्ष शेरबहादुर खत्रीको घरमा आगलागी हुँदा करोडौँको क्षति भएको छ ।
सिद्धिचरण नगरपालिका वडा नं. ३ अँधेरीस्थित केसीको घरमा २०८१ पुस २९ गते आगलागी भएको हो ।
अध्यक्ष खत्रीका अनुसार निजकी पत्नी गोठमा गएको र छोराछोरी बाख्रा चराउन गएका बेला सो घटना घटेको छ ।
उहाँले नजिकै रहेको विद्युत् पोलमा सर्ट हुँदा आगलागी भएको हुन सक्ने अनुमान व्यक्त गर्नुभएको छ ।
आगलागीका बेला केसी मिसन अस्पतालमा उपचारका लागि जानुभएको थियो ।
आगलागीमा परी २५ तोलाजति सुन, ३५ तोलाजति चाँदी, ८० मुरीभन्दा बढी अन्न, साढे तीन लाख नगद डढेको छ । त्यस्तै घरभित्र रहेका मोबाइल, ओढ्नेओछ्याउने सबै डढेको छ ।
‘हामीले केही निकाल्न पाएनौँ’ खत्रीले युगदर्शनसित भन्नुभयो– ‘श्रीमती गोठ गएको, छोराछोरी बाख्रा फुकाएर गएको र म मिसन अस्पतालमा आएका बेला यो दुर्घटना भयो । मलाई श्रीमतीले फोन गरेपछि मात्रै आइपुगेको थिएँ ।’
आफूहरूको परिवार २० जनाजतिको भए पनि हाल श्रीमती, एउटा छोरी र कान्छो छोरा मात्रै त्यो घरमा बस्दै आएको उहाँले बताउनुभयो ।
‘अहिले कान्छो छोराको विवाह गर्नका लागि गहना कमाएका थियौँ । छोरालाई बाइक किन्नका लागि भनेर श्रीमतीले अढाई लाख रुपियाँ निकालेर राखेकी थिइन् । त्यस्तै, मैले अघिल्लो दिन ७५ हजार रुपियाँ निकालेर राखेको थिएँ । त्यसबाहेक ४२ हजार नगद अरू थियो’ उहाँले बयान दिनुभयो ।
आगलागीमा राजमोका कागजात पनि डढेको उहाँले जानकारी दिनुभयो ।
उहाँले आगो अहिलेसम्म पनि पूर्ण रूपमा निभ्न नसकेको बताउनुभयो ।
‘आगो अझै पूरै निभिसकेको छैन । हामी नजिकैको अर्को कटेरोमा बसेका छौँ’ उहाँले भन्नुभयो ।
आगलागीको सम्बन्धमा नगरपालिकाले सहयोग गर्ने आश्वासन दिएको उहाँले बताउनुभयो ।
‘मेयरले आवश्यक सहयोग गर्छौं, थप सहयोगका लागि प्रदेशमा पनि अपिल गर्छौं भन्नुभएको छ’ मेयरलाई उद्धृत गर्दै उहाँले भन्नुभयो–
‘उहाँहरूले उपलब्ध गराउनुभएका ओढ्नेओछ्याउनेमै हामी रात काटिरहेका छौँ ।’
