काठमाडौं । रुपन्देहीको बुटवलस्थित सुप्रिम सहकारी ठगी प्रकरणमा राष्ट्रिय स्वतन्त्र पार्टीका सभापति रवि लामिछानेसँग चार करोड भन्दा बढी बिगो माग गरिएको छ ।
प्रहरीले दोस्रो चरणको अनुसन्धान सकेर जिल्ला सरकारी वकिल कार्यालय रुपन्देहीमा बुझाएको अनुसन्धान प्रतिवेदनमा सो बिगो कायम गर्न सिफारिस गरेको हो ।
जिल्ला सरकारी वकिल कार्यालय रुपन्देहीका प्रमुख जिल्ला न्यायाधिवक्ता प्रेमराज पौडेलले अनुसन्धान प्रतिवेदन प्राप्त भएको बताउँदै अभियोजनका लागि तयारी गरिरहेको बताए ।
पुरक अनुसन्धानमा रास्वपा सभापति लामिछाने र नेपाल प्रहरीका पूर्वडीआईजी छविलाल बन्जाडे जोशीसहित १४ जनालाई प्रतिवादी बनाउन प्रहरीको राय छ ।
यसअघिको पहिलो चरणको अनुसन्धानमा २८ जनाविरुद्ध अभियोग दर्ता भएको थियो। दोस्रो चरणको अनुसन्धानपछि यो मुद्दाको बिगो पनि थप भएको छ । पहिलो चरणमा जम्मा बिगो १ अर्ब ३ करोड रहेकोमा ९ करोड बिगो बढेको छ ।
अब जम्मा बिगो १ अर्ब १२ करोड बढी कायम भएको छ ।
प्रतिवादी रवि लामिछाने र छविलाल जोशीको हकमा पनि छुट्टा छुट्टै बिगो कायम गरिएको छ । लामिछानेको हकमा प्रहरीले ४ करोड बढी बिगो कायम गरेर पठाएको सरकारी वकिल कार्यालय स्रोतले जानकारी दिएको छ ।
लामिछानेलाई भन्दा बन्जाडेलाई ७÷८ लाख बढी बिगो कायम गरिएको छ । दुवै जनाको हकमा व्यक्तिगत दायीत्व करिव २ करोड र सामुहिक दायित्व २ करोड जति नै गरी ४ करोड बढी बिगो कायम भएको स्रोतले जानकारी दिएको छ ।
उनीहरुमाथि सहकारी ठगी र संगठित अपराधको कसुरमा अभियोग दायर गर्न प्रहरीको राय छ । सम्पत्ति शुद्धीकरणमा कास्की अदालतमै मुद्दा दायर भइसकेकाले रुपन्देहीमा नहुने भएको छ ।
जिल्ला प्रहरी कार्यालय कास्कीको हिरासतमा रहेका रवि र छविसहितका ७ प्रतिवादी धरौटीमा रिहा भएका छन्।
रविलाई कास्की जिल्ला अदालतले ६५ लाख धरौटीमा र छविलाई ८८ लाख धरौटीमा रिहा गर्न आदेश दिएको छ। आदेश आएको केहिबेरमै धरौटी बुझाएर उनीहरु रिहा भएका हुन्।
