काठमाडौँ । वैज्ञानिक समाजवादी कम्युनिस्ट पार्टीको महासचिवमा आहुति (विश्वभक्त दुलाल) चयन भएका छन् ।
२०८१ पुस १९ देखि २१ गतेसम्म काठमाडौँमा सम्पन्न पार्टीको प्रथम राष्ट्रिय सम्मेलनले आहुतिको नेतृत्वमा सङ्गठनको ५१ सदस्यीय केन्द्रीय समिति चयन गरेको हो ।
पार्टीको प्रवक्तामा मदन अर्याल चयन भएका छन् ।
पार्टीले पुस २४ गते बुधबार दिउँसो काठमाडौँमा पत्रकार सम्मेलन गरेर राष्ट्रिय सम्मेलन र त्यसपछि बनेको केन्द्रीय समितिको पहिलो बैठकले गरेका निर्णय सार्वजनिक गरेको छ ।
आफ्नो पार्टीले समानान्तर सत्ताको आर्थिक, राजनीतिक र सांस्कृतिक अभ्यास गर्ने निर्णय गरेको आहुतिले बताए ।
उनले पार्टीले उठाएका सैद्धान्तिक र वैचारिक प्रश्नलाई छरिएर रहेका क्रान्तिकारी कम्युनिस्टमाझ बहस सञ्चालन गर्दै एकताबद्ध बनाउन पहल लिने निर्णय गरेको जानकारी दिए ।
क्रान्तिकारी शक्तिका बिचमा संयुक्त मोर्चा निर्माण गरी राष्ट्रियता, जनतन्त्र र जनजीविकाको सवालमा नयाँ उचाइमा सङ्घर्षको उठान गर्ने निर्णय गरेको सो पार्टीले जनाएको छ ।
