काठमाडौँ । पाँच विद्यार्थी सङ्गठन र त्रिभुवन विश्वविद्यालयको माझमा नौ बुँदे सहमति भएको छ ।
२०८१ पुस २२ गते सोमबार पाँच विद्यार्थी सङ्गठनका प्रतिनिधि र त्रिवि वार्ता समितिमाझ सो सहमति भएको हो ।
सहमतिपत्रको पहिलो बुँदामा मेरिटोक्रेसीको आधारमा क्याम्पस प्रमुखको नियुक्त प्रक्रिया कार्यान्वयन गर्ने, दोस्रो बुँदामा डा. पुष्कर रेखोला नेतृत्वको छानबिन समितिले दिएको समकक्षतासम्बन्धी प्रतिवेदनअनुसार २०१३ सालपछिका निर्णयको प्रतिवेदन एक महिनाभित्र तयार पार्ने र अन्यको समकक्षता छानबिन गर्ने उल्लेख गरिएको छ ।
तेस्रो बुँदामा अध्ययन बिदा लिई विदेश वा स्वदेशमा रहेका शिक्षक, कर्मचारीको सेवासुविधा दुई हप्ताभित्र सार्वजनिक गरी कारबाही प्रक्रिया अघि बढाउने, चौथो बुँदामा त्रिविको जग्गासम्बन्धी त्रिताल आयोगको प्रतिवेदन सार्वजनिक गर्न एक हप्ताभित्र पत्राचार गर्ने उल्लेख छ ।
सहमतिको पाँचौँ बुँदामा त्रिविका करार तथा आंशिक शिक्षक, कर्मचारीको सम्बन्धमा सर्वोच्च अदालतको फैसला कार्यान्वयन गर्ने तथा रिक्त पदमा विज्ञापन सुरु गर्ने, त्यस्तै, छैटौँ बुँदामा मानविकी, शिक्षाशास्त्र, व्यवस्थापन र विज्ञान तथा प्रविधि सङ्कायका बिहानी र दिउँसो कक्षा सञ्चालन गर्ने उल्लेख छ ।
सातौँ बुँदामा त्रिवि परीक्षा कार्यालयबाट उत्तरपुस्तिका हराएको सम्बन्धमा डा. चन्द्रमणि पौडेल नेतृत्वको समितिले दिएको प्रतिवेदन सार्वजनिक गरी दोषीउपर कारबाही प्रक्रिया अघि बढाउने तथा आठौँ बुँदामा पढ्दै कमाउँदै योजना कार्यान्वयन गर्न निर्देशिका तयारी गरी अगाडि बढ्ने, साथै केन्द्रीय विभागमा अध्ययनरत विद्यार्थीलाई अनिवार्य इन्टर्नसिपको व्यवस्था गर्ने सहमति भएको छ ।
एवम् प्रकारले नवौँ बुँदामा पुस २२ गतेदेखि विद्यार्थी सङ्गठनका धर्ना कार्यक्रम स्थगित गर्ने सहमति भएको उल्लेख छ ।
सहमतिपत्रमा त्रिविस्थित पाँच विद्यार्थी सङ्गठनको तर्फबाट अखिल (छैठौं) का इन्चार्ज विवेक जिसी, अखिल (क्रान्तिकारी) अध्यक्ष दिनेश ऐर, अनेरास्ववियूका अध्यक्ष समीर गौतम, अखिल समाजवादीका इन्चार्ज सतल सी र नेपाल समाजवादी विद्यार्थी युनियनका इन्चार्ज रामनरेश यादवको हस्ताक्षर रहेको छ ।
त्यस्तै त्रिवि वार्ता समितिको तर्फबाट संयोजक प्रा. पशुपति अधिकारी, सदस्यहरू सहप्राध्यापक विष्णुप्रसाद वाग्ले र उपप्राध्यापक डा. अवतार सुवेदीको हस्ताक्षर रहेको छ ।
