दाङ । राष्ट्रिय जनमोर्चाले माघ महिनाका विभिन्न मितिमा जिल्ला तथा पालिकास्तरीय सङ्घीयताबारे अन्तरक्रिया कार्यक्रम गर्ने भएको छ ।
राजमो केन्द्रीय सदस्य तथा जिल्ला अध्यक्ष गणेश आचार्यको हस्ताक्षरमा २०८१ पुस २२ गते सोमबार जारी प्रेसविज्ञप्तिमार्फत् सो जानकारी दिइएको हो ।
“सङ्घीयताद्वारा उत्पन्न सङ्कट र त्यसका विरुद्ध राजधानीकेन्द्रित आन्दोलनको प्रश्न” विषयक सो अन्तरक्रिया घोराहीमा जिल्ला स्तरको तथा अन्य पालिकामा पालिकास्तरीय स्वरूपको रहनेछ ।
ती अन्तरक्रिया माघ १२ गते गढवामा, माघ १७ गते राप्तीमा, माघ १९ गते तुलसिपुरमा, माघ १८ गते लमहीमा र माघ २५ गते घोराहीमा आयोजना गरिएका छन् ।
गत मङ्सिरदेखि दाङमा चलिरहेको सङ्घीयता विरुद्धको सङ्गठनात्मक अभियानको समीक्षा गर्दै विज्ञप्तिमा आगामी माघ मसान्तसम्मको सो कार्यक्रमलाई थप प्रभावकारी बनाउने उल्लेख छ ।
विज्ञप्तिमा सङ्घीयता विरुद्धको आन्दोलन खालि राष्ट्रिय जनमोर्चाको सरोकारको विषय नभएर आम नेपालीको सरोकारको विषय बनेको भन्दै त्यसका लागि स्थानीय स्तरमा पनि सङ्घीयता विरोधी मञ्च निर्माण गरिने बताइएको छ ।
त्यस क्रममा विज्ञप्तिमा सम्पूर्ण सङ्घीयता विरोधीलाई सो मञ्चमा सामेल हुन आग्रह गरिएको छ ।
