दिनेश रैदास, दाङ ।
राष्ट्रिय जनमोर्चा दाङले सङ्घीयता खारेजीका लागि चैत २४ देखि ३० गतेसम्म आयोजित राजधानीकेन्द्रित आन्दोलनको तयारीस्वरूप पत्रकार सम्मेलन सम्पन्न गरेको छ ।
राजमो जिल्ला समिति दाङको आयोजनामा २०८१ पुस २२ गते सोमबारका दिन घोराहीमा सो कार्यक्रम सम्पन्न भएकोे हो ।
कार्यक्रममा राजमो केन्द्रीय कार्यकारी अध्यक्ष रश्मिराज नेपालीले पत्रकारका जिज्ञासाको उत्तर दिनुभएको थियो ।
त्यस क्रममा उहाँले नेपाली काङ्ग्रेस र एमाले सरकार देश, जनता र राष्ट्रियताको पक्षमा नभएको दाबी गर्नुभयो ।
उहाँले भन्नुभयो– ‘देशमा भ्रष्टाचारको मुद्दा बारम्बार उठ्ने गरेको छ, जसले शासनप्रति जनताको विश्वास घटाएको छ ।’
अध्यक्ष नेपालीले सङ्घीयता र जातीय पहिचानका मुद्दाहरूमा सत्ताइतर राजनीतिक दलहरू सीमित भएको बताउनुभयो ।
‘यसको कारणले समस्या समाधानभन्दा पनि झनै गहिरो गरी समाजमा विभाजन आउन सक्ने खतरा उत्पन्न भएको छ’ उहाँले भन्नुभयो ।
कार्यक्रममा राजमो जिल्ला समिति दाङको प्रेसनोट राजमो केन्द्रीय सदस्य तथा दाङ जिल्लाका अध्यक्ष गणेश आचार्य प्रस्तुत गर्नुभएको थियो ।
कार्यक्रममा राजमो नेता सुरेश थापा, राजमो दाङका सल्लाहकार मेघराज भट्टराई, अखिल नेपाल जनजाति सम्मेलनका केन्द्रीय सदस्य रामबहादुर जिएमलगायतका नेताहरूको उपस्थिति रहेको थियो ।
