दिनेश रैदास, दाङ ।
राप्ती गाउँपालिका–१ भालुबाङ अस्पतालमा मेडिकल सुपेरिटेन्डेन्टको जिम्मेवारी सम्हाल्न आउनुभएका वरिष्ठ अर्थोपेडिक डा. आकाश बेलबासेलाई स्वागत गरिएको छ ।
लालमटिया स्वास्थ्यचौकी भालुबाङका प्रमुख कृष्णप्रसाद श्रेष्ठको आतिथ्य र राप्ती गाउँपालिका वडा नं. १ का वडाअध्यक्ष तथा स्वास्थ्यचौकी व्यवस्थापन समितिका अध्यक्ष गेमबहादुर खड्काको प्रमुख आतिथ्यमा २०८१ पुस १७ गते बुधबारका दिना आयोजित एक कार्यक्रममाझ उहाँलाई स्वागत गरिएको हो ।
कार्यक्रममा प्रमुख अतिथि वडाअध्यक्ष खड्का, विशिष्ट अतिथि राप्ती गाउँपालिका स्वास्थ्य शाखा प्रमुख नारायण रावत, जनस्वास्थ्य अधिकृत अस्मिता नेपाल, सिसिपिएचका डाक्टर अचुत न्यौपाने, एसएसएसका अफिसर सन्देश पौडेल, स्टाफ नर्स छाया बस्नेतलगायत स्वास्थ्यचौकी व्यवस्थापन समितिका पदाधिकारीले मेडिकल सुपरिटेन्डेन्ट बेलबासे र स्टाफ नर्स छाया बस्नेतलाई अबिर तथा पुष्पगुच्छाले स्वागत गर्नुभएको थियो ।
कार्यक्रमको सञ्चालन डा. सचिता खड्काले गर्नुभएको थियो ।
लुम्बनी प्रदेशका पूर्व स्वास्थ्यमन्त्री तथा दाङ निर्वाचन क्षेत्र नं. १ (क) का प्रदेशसभा सदस्य इन्द्रजित चौधरीको पहलमा प्रस्तावित भालुबाङ अस्पतालको रूपमा सञ्चालन हुँदै आएको लुम्बिनी प्रदेश सरकारको पूर्ण स्वामित्व र जिम्मेवारी राख्ने गरी आजदेखि ५० सैयाको भालुबाङ अस्पतालका रूपमा पूर्णता पाएको छ ।
यस कार्यबाट पूर्वी देउखुरीका राप्ती गाउँपालिका, गढवा गाउँपालिकाका पूर्वी वडा १, २ र ३, अर्घाखाँचीको शीतगङ्गा नगरपालिकाका वडा नम्बर ८ र ९, प्युठानको सरुमारानी गाउँपालिका, कपिलवस्तुका शिवराज नगरपालिका र दाङको बङ्गलाचुली गाउँपालिकाका स्थानीय प्रत्यक्ष लाभान्वित हुने तथा पूर्वपश्चिम राजमार्ग र भालुबाङ, प्युठान, रोल्पा सडकखण्डमा हुने दुर्घटनाबाट घाइते नागरिकलाई तत्काल उपचार सेवा लिन सुविधा हुने छ ।
अस्पतालले आजदेखि पूर्णता पाएकोमा स्थानीय बाबुराम थापा, माबुल मिया, भरतमणि न्यौपाने र टङ्कबहादुर महतरालगायतले खुसी व्यक्त गर्नुभयो ।
अस्पतालमा निक्स साइमन इन्स्टिट्युट सानेपा ललितपुरबाट वरिष्ठ एमडिजिपीका डा. रणबहादुर बोगटीलगायत स्वास्थ्यकर्मी खटिनुभएको छ ।
