काठमाडौँ । नेकपा (एमाले) बाट निष्काशित भएका नेता डा. भीम रावलले नयाँ पार्टी बनाउने घोषणा गरेका छन् ।
पार्टी निर्माण गर्न उनले २०८१ पुस १७ गते बुधबार कार्की ब्याङ्क्वेट बबरमहलमा पत्रकार सम्मेलन आयोजना गरेका हुन् ।
गैरकम्युनिस्ट पार्टी बनाउने तयारी गरेका रावललाई सोमबार निवासमै भेट्न पुगेका सुदूरपश्चिमका प्रदेश सांसद डा. तारा जोशी र नेपाली काङ्ग्रेस (बिपी) का नेता कर्ण मल्लसँगको भेटमा उनले सो कुरा खुलाएका छन् ।
रावलले आफूले देशव्यापी सङ्गठन विस्तार गरेर नयाँ पार्टी बनाउने भन्दै मिलेर जाने प्रस्तावसमेत राखेका छन् ।
काङ्ग्रेस पृष्ठभूमि र अन्य राजनीतिक दलबाट आउने नेताहरूलाई समेत मान्य हुने पार्टीको नाम राख्ने रावलको भनाइ रहेको डा. जोशीले जानकारी दिए ।
नेपाली काङ्ग्रेसको कारबाहीमा परेका नेता कर्ण मल्लको पहलमा आफूहरू रावलको निवासमा गएको जोशीले बताए ।
केही दिनअघि बसेको सचिवालय बैठकले रावललाई सङ्गठित सदस्यसमेत नरहने गरी पार्टीबाट निकाला गरेको छ । यसपछि रावलले नेताकार्यकर्तासँग छलफल गरेर नयाँ पार्टी खोल्ने तयारी गरेका हुन् ।
भीम रावलसँग मिलेर जाने प्रस्ताव मेरो : मल्ल
त्यस्तै, नेपाली काङ्ग्रेसले कारबाही गरेपछि काङ्ग्रेस बिपीका नेता रहेका कर्ण मल्लले एमालेले कारबाही गरेका नेता डा. रावलसँग मिलेर जाने सम्भावना बढ्दै गएको बताएका छन् । सोमबारको भेटपछि आफूहरू एकै ठाउँमा हुन सक्ने उनले बताए ।
आफ्नै चाहनामा रावलसँग भेट भएको र मिलेर जाने प्रस्तावसमेत आफैले राखेको मल्लको भनाइ छ ।
