पोखरा । कास्की पोखराको लखनचोक र पृथ्विनारायण क्याम्पस गेटबाट पुस ५ गतेदेखि इजरायली नरसंहारको विरुद्ध हस्ताक्षर अभियान सङ्कलन गरिने भएको छ ।
कास्कीस्थित छ वामपन्थी राजनीतिक दलले २०८१ पुस ३ गते बुधबार प्रेसविज्ञप्ति जारी गर्दै सो जानकारी गराएका हुन् ।
विज्ञप्तिमा राष्ट्रिय जनमोर्चाका सचिव विष्णु पुरी, नेकपा (एकीकृत समाजवादी) का उपाध्यक्ष पूर्ण लामा, नेकपा (माओवादी केन्द्र) का संयोजक विश्वप्रकाश लामिछाने, नेकपाका प्रतिनिधि सोममाय सी, क्रान्तिकारी कम्युनिस्ट पार्टीका सेक्रेटरी बिक्रम थापा र नेपाल समाजवादी पार्टी (नयाँ शक्ति) का प्रतिनिधि किरण थापाको हस्ताक्षर रहेको छ ।
यस्तो छ विज्ञप्तिको पूर्ण पाठ :
“विगत लामो समयदेखि इजरायलले प्यालेस्टाइनमाथि जारी राखेको मानवता विरोधी सशस्त्र आक्रमणप्रति कास्कीमा क्रियाशील हामी छओटा राजनैतिक दलको गम्भीर ध्यानाकर्षण भएको छ ।
यस आक्रमणले प्यालेस्टाइनी जनताको बाँच्न पाउने आधारभूत अधिकारको गम्भीर उल्लङ्घन भएको छ । प्यालेस्टाइनी भूमि अतिक्रमण गर्ने, निहत्था जनतामाथि मिसाइल, गोलाबारुदलगायत घातक हतियार प्रहार गरी हत्या गर्ने, स्कुल तथा अस्पतालमा निर्लज्ज आक्रमण गरी जनसंहार गर्ने, इजरायली आक्रमण एक्काइसौँ शताब्दीको सभ्य समाजका लागि अस्वीकार्य रहेको हाम्रो ठहर छ ।
संसारका जुनसुकै भूगोल, समुदाय वा वर्गका मानिस किन नहोउन्, उनीहरूमा शान्तिपूर्वक बाँच्न पाउने, आफ्नो धर्म, पेसा र व्यवसाय अँगाल्न पाउने, शिक्षा र स्वास्थ्य सेवाको निर्बाध हक भोग गर्न पाउनेलगायत अधिकार रहन्छ । पछिल्लो समय इजरायलले प्यालेस्टाइनी जनतामाथि अत्यन्त हेपाहा र अधिनायकवादी कदम चालिरहेको छ । यो आक्रमण मानव अधिकारको न्यूनतम मूल्य र मान्यतालाई अस्वीकार गर्ने प्रकारले सञ्चालित छ । हामी प्यालेस्टाइनी जनताको हत्यामा परिचालित घातक हतियार उपलब्ध गराउने सहयोगी राष्ट्रसमक्ष हतियार आपूर्ति बन्द गर्न र प्यालेस्टाइनमाथिको निर्मम आक्रमण बिनाशर्त रोक्न इजरायलसमक्ष जोडदार माग गर्दछौँ ।
यसै सन्दर्भमा २०८१ पुस ५ गते दिउँसो १ बजे लखनचोक (पृथ्वीचोक) मा र पुस ७ गते बिहान ८ बजे पृथ्वीनारायण क्याम्पस गेट बगरमा प्यालेस्टाइनी जनताको सार्वभौम अधिकारको पक्षमा ऐक्यबद्धता जाहेर गर्दै इजरायलले गरिरहेको सशस्त्र आक्रमण विरुद्ध हस्ताक्षर सङ्कलन अभियान सञ्चालन गर्न गइरहेको जानकारी गराउँछौँ । उक्त अभियानमा सरिक भइदिनुहुन सम्पूर्ण राजनैतिक दलका नेता तथा कार्यकर्ता, युवाविद्यार्थी, पेसाव्यवसायी, मानवअधिकारकर्मी, सञ्चारकर्मीलगायत न्यायप्रेमी आम जनसमुदायमा प्यालेस्टाइनमाथि इजरायली जनसंहार विरुद्ध संयुक्त अभियान कास्की हार्दिक अपिल गर्दछ ।”
