जितेन्द्र खत्री, सन्धिखर्क ।
अर्घाखाँची जिल्ला भूमिकास्थान–७ ढाकाबाङ कोटमैदानस्थित भगवति माध्यमिक विद्यालयको त्रिसट्ठिऔँ वार्षिकोत्सव सम्पन्न भएको छ ।
भूमिकास्थान नगरपालिकाका नगरप्रमुख झबिलाल थापाको प्रमुख आतिथ्य २०८१ पुस २ गते मङ्गलबार उक्त कार्यक्रम सम्पन्न भएको हो ।
सो अवसरमा मन्तव्य राख्दै नगरप्रमुख थापाले गत सालको तुलनामा विद्यालय सुधारोन्मुख रहेकोमा खुसी व्यक्त गर्नुभयो ।
उहाँले अहिले गाउँका विद्यालयहरू विद्यार्थीविहीन स्थितिमा पुग्न लागेकोमा चिन्ता पनि व्यक्त गर्नुभयो ।
कार्यक्रममा विशिष्ट अतिथि शिक्षा शाखा प्रमुख टुवलाल सापकोटा तथा अन्य अतिथिहरू पूर्व प्रधानाध्यापक कमलप्रसाद खनाल, विश्व माविका पूर्व प्रधानाध्यापक जुमलाल खनाल, अभिभावक सङ्घका अध्यक्ष राजु सुनार, वडासदस्य नारायणप्रसाद खनाल, शैक्षिक व्यक्तित्व जीवनारायण खनाललगायतले शुभकामना मन्तव्य राख्नुभएको थियो ।
कार्यक्रममा विद्यालयका कक्षा १ देखि १० सम्मका प्रथम, द्वितीय तथा तृतीय हुने अनुशासित र जेहेन्दार विद्यार्थीलाई स्मृतिशेष काबेरी खनाल र फर्सुराम खनाल अक्षयकोषबाट पुरस्कार वितरण गरिएको थियो ।
त्यसैगरी अतिरिक्त क्रियाकलापमा भाग लिई प्रथम, द्वितीय तथा तृतीय हुने विद्यार्थीलाई पनि पुरस्कार वितरण गरिएको थियो ।
विद्यालयमा हाल २३९ विद्यार्थी अध्ययनरत छन् भने १२ जना शिक्षक तथा कर्मचारी कार्यरत छन् ।
कार्यक्रममा २ नम्बर वडाभित्रका विद्यालयका प्रधानाध्यापक, विभिन्न सङ्घसंस्थाका अध्यक्षलगायतको उपस्थिति रहेको थियो ।
विद्यालय व्यवस्थापन समितिका अध्यक्ष चुरामणि खनालको अध्यक्षतामा भएको कार्यक्रममा प्रधानाध्यापक विष्णुप्रसाद बेलबासेले वार्षिक प्रगति प्रतिवेदनसँगै विद्यालयको अवस्थाबारे जानकारी प्रस्तुत गर्नुभएको थियो ।
कार्यक्रम शिक्षक निता रानाको स्वगत मन्तव्य र खुम थापाको सञ्चालनमा सम्पन्न भएको थियो ।
