काठमाडौँ । प्रगतिशील पत्रकार सङ्घको तर्फबाट नेपाल पत्रकार महासङ्घमा निर्वाचित प्रतिनिधिलाई नेकपा (मसाल) ले सम्मान गरेको छ ।
महामन्त्री मोहनविक्रम सिंहले २०८१ पुस २ गते मङ्गलबार राष्ट्रिय जनमोर्चा केन्द्रीय कार्यालय कपनमा आयोजित औपचारिक कार्यक्रममाझ सम्मान गरिएको हो ।
उपत्यका प्रदेश समितिको सदस्यमा घनश्याम अधिकारी (वैरागी जेठा) तथा काठमाडौँ जिल्ला समितिको सदस्यमा निर्वाचित गोविन्द शर्मा र चेतनारायण बेलबासेलाई कार्यक्रममा सम्मान गरिएको हो ।
कार्यक्रममा पार्टी प्रवक्ता रामप्रकाश पुरी, वामपन्थी नेता आनन्द शर्मा, राजमो उपाध्यक्ष तथा प्रवक्ता दुर्गा पौडेल, केन्द्रीय कोषाध्यक्ष मधु क्षेत्री, केन्द्रीय सचिव घनश्याम न्यौपाने, केन्द्रीय सदस्यहरू लालबहादुर थापा, सुधा पौडेल, रामकुमार क्षेत्री, अखिल नेपाल किसान महासङ्घ (अप्फा) का अध्यक्ष भैरवराज रेग्मी, अखिल नेपाल महिला सङ्घकी अध्यक्ष मीना पुन, राजमो पूर्व केन्द्रीय सचिव कृष्ण अधिकारी, अखिल (छैठौं) का अध्यक्ष सुवास जिसी, प्रगतिशील पत्रकार सङ्घका महासचिव प्रकाश थापामगर, केन्द्रीय सदस्य तथा बागमती प्रदेश अध्यक्ष रमेश पौडेल, केन्द्रीय सदस्य लक्ष्मी चौधरी, केन्द्रीय सदस्य काठमाडौँका जिल्ला अध्यक्ष रोशन दानीलगायतका मसालनिकट नेताकार्यकर्ताको आतिथ्य रहेको थियो ।
गठबन्धन महत्त्वपूर्ण : सिंह
कार्यक्रममा सङ्क्षिप्त शुभकामना दिँदै महामन्त्री सिंहले पत्रकारको चुनावमा भएको तालमेलले विचारमाथि आधारित गठबन्धनको औचित्य रहेको स्पष्ट पार्नुभयो ।
उहाँले भन्नुभयो– ‘पत्रकार महासङ्घको निर्वाचनमा तपाईंहरूले गर्नुभएको गठबन्धनबाट यसको महत्त्वपूर्ण भूमिका रहेको स्पष्ट हुन्छ ।’
उहाँले जहिले पनि सिद्धान्त, नीति र विचारमाथि आधारित गठबन्धनको औचित्य रहने स्पष्ट पार्नुभयो ।
निर्वाचित पत्रकारहरूले पत्रकारिताको आस्था र निष्ठाअनुसार काम गर्नुपर्ने अपेक्षामा उहाँले जोड दिनुभयो ।
