काठमाडौं । मेदान्त आयुर्वेद हस्पिटलको उद्घाटन भएको छ । शनिबार काठमाडौंमा आयोजित एक कार्यक्रमबीच वरिष्ठ क्याप्टेन विजय लामा र अभिनेत्री गौरी मल्लले हस्पिटलको उद्घाटन गरेका हुन् ।
सोही क्रममा अभिनेत्री गौरी मल्लले अहिले खाएर अहिले परिणाम आउने औषधिभन्दा आयुर्वेदिक औषधि राम्रो हुने बताइन् । यस्तै, उनले आयुर्वेदिक औषधि प्रयोग गर्दा धैर्यता राख्नुपर्ने भन्दै यसको परिणाम आउन ढिला भएपनि राम्रो हुने बताइन् ।
उनले भनिन्, ‘परापूर्व कालमा बन्ने त्यो दबाईहरूबाट हाम्रो घरेलु उपचार गर्दै आउनु भएको थियो भन्ने एउटा प्रसंग आएको छ । यो प्रायः हाम्रो उमेर समूहको मान्छेहरू सबैले गर्नु भएको छ जस्तो लाग्छ । हामीले त्यो प्रकारको औषधि खाएका पनि छौँ र जानेर नजानेर त्यो उपचार पनि गरेका पनि छौँ । हामीलाई अहिले खाएर अहिले परिणाम आउने औषधि चाहिन्छ तर आयुर्वेदिक औषधिहरूले केही समय लिन्छ । यस्तो औषधिको लागि धैर्य राख्नुपर्छ ।’
त्यस्तै क्याप्टेन लामाले आर्युवेद निकै पुरानो औषधि भएको र यसलाई विकल्पका रुपमा राख्न नहुने बताए ।
नेपाल एयरलायन्समा ३८ वर्षसम्म जहाज उडाएका क्याप्टेन लामाले ६४ वर्षको उमेरमा पुग्दा मुख्य रुपमा खानपान र व्यायाममा ध्यान दिनुपर्ने बताए । त्यति गर्दा पनि शरीरमा समस्या देखिए पहिलो प्राथमिकतामा आयुर्वेदलाई नै विश्वास गर्नुपर्ने कुरामा जोड दिए ।
क्याप्टेन लामाले मेदान्त आयुर्वेद हस्पिटलका वरिष्ठ चिकित्सक तथा अध्यक्ष डाक्टर सुवर्ण पौडेललाई हौस्याउँदै सँधै डटेर लाग्न भन्दै उत्साह समेत प्रदान गरे ।
सो अवसरमा डाक्टर पौडेलले मेदान्त आयुर्वेद हस्पिटलका बारेमा जानकारी दिँदै जम्मा १ सय रुपैयाँमा ओपीडी सुरु गरिएको जानकारी दिए । नयाँ र व्यबस्थित भवनमा उचित सेवा सुबिधासहित न्यूनतम मूल्यमा सुविधा दिइएको डाक्टर पौडेलले बताए ।
उनले डाक्टरले बिरामीलाई समय दिएजस्तै बिरामीले पनि खानपान र स्वास्थ्यका बारेमा पनि सचेत हुन जरुरी रहेको बताए ।
