काठमाडौँ । त्रिभुवन विश्वविद्यालयका पाँच विद्यार्थी सङ्गठनले स्वतन्त्र विद्यार्थी युनियनको कार्यालयमा ताल्चा लगाएका छन् ।
त्रिवि अन्तर्राष्ट्रिय क्रिकेट मैदान कीर्तिपुरमा मङ्सिर १५ गतेदेखि सञ्चालन भइरहेको नेपाल प्रिमियर लिग (एनपिएल) खेल हेर्न आएका दर्शकका सवारी साधनको पार्किङ शुल्कप्रति विरोध जनाउँदै उनीहरूले मङ्सिर १८ गते मङ्गलबार ताल्चा लगाएका हुन् ।
सो अवसरमा निकालिएको संयुक्त विज्ञप्तिमा अखिल (छैठौं) का विवेक जिसी, अखिल (क्रान्तिकारी) का दिनेश ऐर, अनेरास्ववियूका समीर गौतम, अखिल (समाजवादी) का सतल सी र नेपाल समाजवादी विद्यार्थी युनियनका रामनरेश यादवको हस्ताक्षर रहेको छ ।
त्रिवि प्रिन्सिपलको कार्यालय, त्रिवि स्ववियु क्याम्पस, सामान्य प्रशासन कार्यालय र क्रिकेट एसोसियसन (क्यान) लाई उनीहरू सो विज्ञप्तिको बोदार्थ पठाएका छन् ।
दर्शकको सवारी साधनको व्यवस्थित रूपमा निःशुल्क पार्किङका लागि खल्तीलाई जिम्मेवारी दिइए पनि पार्किङको नाममा उद्घाटनको दिन उठाएको शुल्क अवैधानिक भएकाले छानबिन गर्नुपर्ने माग उनीहरूको छ ।
स्ववियुले एकलौटी निर्णय गरी पैसा कमाउने र निकटका विद्यार्थीलाई परिचालन गरी अपारदर्शी ढङ्गबाट भौचर कटाई पार्किङको नाममा शुल्क उठाउनु अवैधानिक भएकाले उक्त कार्यको छानबिन गर्नुपर्ने माग विद्यार्थी सङ्गठनले गरेका छन् ।
विद्यार्थी सङ्गठनले पार्किङ शुल्क उठाउने कार्यले विश्वविद्यालय र विद्यार्थीको साझा संस्था स्ववियुको गरिमामाथि आँच आउने कार्य गरेको प्रति गम्भीर ध्यानाकर्षण भएको उल्लेख गरेका छन् ।
“उक्त अवैधानिक गतिविधिमा संलग्न व्यक्तिमाथि तत्काल छानबिन गरी आवश्यक कारबाहीको जोडदार माग गर्दै स्ववियु कायर्यालयमा अनिश्चितकालीन तालाबन्दी गरिएको जानकारी गराउँछौँ” विज्ञप्तिमा भनिएको छ– “यदि यथाशीघ्र उक्त कार्यमा संलग्न व्यक्ति र गतिविधिमाथि छानबिन गरी कारबाहीको दायरामा नल्याए थप आन्दोलनका गतिविधि सञ्चालन हुने र त्यस कार्यबाट उत्पन्न हुने परिणामप्रति सम्बन्धित पक्ष स्वयम् जिम्मेवार हुनुपर्ने छ ।”
उनीहरूले देशको प्रतिष्ठाको रूपमा सञ्चालन भइरहेको एनपिएल खेल अवधिभरि निःशुल्क पार्किङको व्यवस्थापनका लागि सम्बन्धित निकायसित हार्दिक अनुरोधसमेत गरेका छन् ।
