काठमाडौं । अखिल नेपाल बुद्धिजीवी संघको महासचिवमा भरतमणी भण्डारी चयन हुनुभएको छ । भण्डारी यसअघि संघको सचिव हुनुहुन्थ्यो ।

बुद्धिजिवी संघको शुक्रबार बसेको सचिवालयको अनलाइन बैठकले भण्डारीलाई महासचिवमा चयन गरेको हो । अजय शर्माले सो महासचिव पदबाट राजीनामा दिएपछि सो पदमा भण्डारीलाई चयन गरिएको अध्यक्ष प्राध्यापक डा. श्रीधर गौतमले जारी गर्नुभएको विज्ञप्तिमा उल्लेख छ ।

बैठकले भारतले गरेको सीमा अतिक्रमणको भर्त्सना गर्दै सरकारलाई अतिक्रमित भूभागसहितको नयाँ नक्सा सार्वजनिक गर्न माग गरेको छ । यस्तै, कोरोना संक्रमण फैलन नदिन प्रभावकारी कदम चाल्न तथा विदेशमा अलपत्र नेपालीलाई घर ल्याउन पनि माग गरेको छ ।

संघले जारी गरेको विज्ञप्तिका तीन बुँदा यस्ता छन्ः
१) नेपालको भूमि लिम्पियाधुरा, कालापानी, लिपुलेक समेतका क्षेत्र भारतले अतिक्रमण गरेको छ । उक्त नेपालको भूमि लिपुलेक हुँदै कैलाश मानसरोवर ९चीन० जोड्ने सडक निर्माण गरेर भारतीय साम्राज्यवादले पुनः आफ्नो नेपाल माथिको अतिक्रमण र सार्वभौमसत्तालाई चुनौति दिएको छ । भारतको त्यसप्रकारको नीति र कार्यका विरुद्ध देशका राजनीतिक पार्टी, संघ, संस्था तथा आम नेपाली जनसमुदायहरुले संघर्ष गरिरहेका छन् । हाम्रो संगठनले पनि भारतीय साम्राज्यवादको त्यसप्रकारको नीति र कार्यको घोर विरोध र भर्त्सना गर्दै अहिले त्यसका विरुद्ध चलिरहेको संघर्षप्रति ऐक्यबद्धता प्रकट गर्दछ ।

भारतले उपरोक्त क्षेत्रहरु आफ्नो नक्साभित्र पारेर केही महिला अगाडि नयाँ नक्सा जारी गरेको थियो । त्यसका विरुद्ध चलेको संघर्षको परिणाम स्वरुप उक्त भूमि नेपाललाई फिर्ता गराउन प्रभावकारी कदम चाल्न र उक्त भूभागलाई समावेशगरी नक्सा जारी गर्न नेपाल सरकारलाई राष्ट्रिय दबाब दिएको थियो । सरकारले त्यसमा सम्मती पनि दर्शाएको थियो । अहिले आएर त्यो नक्सा जारी गर्न नसकिने भनी प्रधानमन्त्री ओलीले बोलेका छन् ।

यो उनको नेपाल र नेपाली जनताको हितविरुद्धको विचारको हामीले तीव्र रुपमा विरोध गर्दछौँ । उक्त भूभाग फिर्ता गर्ने द्विपक्षीय कुटनीतिक तथा राजनीतिक पहलकदमी बढाउँदै यस विषयलाई अन्तर्राष्ट्रिय क्षेत्र अर्थात् संयुक्त राष्ट्रसंघ तथा अन्तर्राष्ट्रिय अदालत जानुपर्ने आवश्यकता बढेर गएको छ । त्यसप्रकारको नक्सा पनि छिटोभन्दा छिटो जारी गर्न जोडदार माग गर्दछौँ ।

२) अहिले विश्वव्यापीरुपमा कोरोना भाइरसको महामारी फैलिएर ३ लाखभन्दा बढी मानिसहरुको मृत्यु भइसकेको छ र लाखौं मानिसहरु संक्रमित भएका छन् । ती मृत्यु भएका मानिसहरुप्रति श्रद्धाञ्जली प्रकट गर्दै संक्रमित मानिसहरुको शिघ्र स्वास्थ्य लाभको कामना गर्दछौँ । नेपालमा कोरोनाको संक्रमणबाट कसैको ज्यान गएको छैन, तर हालैका केही दिनहरुमा त्यो संक्रमण बढिरहेको छ । त्यसको रोकथाम गर्न प्रभावकारी कदम चाल्नु पर्छ । अन्यथा यदि यसले महामारीको रुप लियो भने देशमा भयावह स्थितिको सिर्जना हुनेछ ।

विदेशमा कोरोनाबाट नेपालीको मृत्यु भएको छ । उहाँहरुप्रति श्रद्धाञ्जली व्यक्त गर्दछौँ । विदेशमा रहेका संक्रमित वा त्यहाँ बस्न असुविधाका कारण वा त्यहाँको सरकारले फिर्ता जान दबाव दिएर स्वदेश आउन चाहेका छन् । भारतको सिमावर्ती क्षेत्रमा हजारौं नेपालीहरु विगत १–२ महिनादेखि अलपत्र परेका छन् । त्यहाँ उनीहरुले ठूलो कष्ट बेहोर्न परेको छ । तर, सरकारले ती विदेशस्थित नेपालीहरुलाई देशभित्र ल्याउन चाहेको छैन । सरकारले तीनलाई देशभित्र ल्याएर व्यवस्थापन गर्न नसकिने डरले ल्याउन नचाहेको हुन सक्छ । सरकारको त्यसप्रकारको विचारप्रति हामीले दुःख प्रकट गर्दछौँ र यो संकटको घडीमा जहाँसुकै रहेका नेपालीहरु स्वदेश फिर्ता हुन चाहान्छन् भने त्यसको व्यवस्थापन गर्न हामीले जोडदार माग गर्दछौँ ।

३) केन्द्रीय समितिका महासचिव अजय शर्माले आफूले काम गर्न असमर्थ भएको र पदबाट हट्न चाहेको कुरा जानकारी गराउनु भएको थियो । उहाँको त्यो कुरालाई बैठकले स्वीकार गरेको छ । रिक्त महासचिव पदमा सचिव श्री भरतमणी भण्डारीलाई र रिक्त हुन आएको सचिव पदमा सदस्य श्री भानुभक्त भारतीलाई मनोनयन गरिएको छ ।’