काठमाडौँ । राष्ट्रिय जनमोर्चाले अर्घाखाँचीको भूमिकास्थानमा कात्तिक १९ गते भएको घटनाप्रति दुःख प्रकट गरेको छ ।

उपाध्यक्ष तथा प्रवक्ता दुर्गा पौडेलको हस्ताक्षरमा २०८१ कात्तिक २० गते मङ्गलबार प्रेसवक्तव्य जारी गर्दै राजमोले मृतकप्रति श्रद्धाञ्जली, शोकसन्तप्त परिवारप्रति समवेदना तथा घाइतेका लागि तत्कालै निःशुल्क उपचारको माग गरेको हो ।

राजमोले सो घटनाको तत्कालै छानबिन गर्न तथा यातायात सुरक्षाको सवालमा ठोस कदम उठाउन पनि सरकार तथा प्रशासनसित माग गरेको छ ।

यस्तो छ, प्रेसवक्तव्यको पूर्ण पाठ :

“हिजो २०८१ कात्तिक १९ गते अर्घाखाँची भूमिकास्थान घटनामा दुई जनाको मृत्यु भएको र ३५ जना घाइते भएकोप्रति राष्ट्रिय जनमोर्चाले दुःख प्रकट गर्दछ । हाम्रो पार्टी घटनामा ज्यान गुमाएका मृतकप्रति श्रद्धाञ्जली, शोकसन्तव्त परिवारप्रति समवेदना तथा घाइतेको तत्कालै निःशुल्क उपचारको माग गर्दछ ।

उक्त घटना कसरी भयो ? बस एकाएक सोही स्थानमा कसरी अनियन्त्रित भयो ? जसले गर्दा देउसीभैलो खेलिरहेका त्यति धेरै जनता त्यसको चपेटामा आए ? यस सम्बन्धमा प्रशासनले तत्कालै गम्भीर छानबिन गर्नुपर्ने आवश्यकतामा राष्ट्रिय जनमोर्चाले जोड दिन्छ । आगामी दिनमा यस खालको दुर्घटना हुन नदिनका लागि यातायात सुरक्षाको क्षेत्रमा ठोस कदम उठाउन पनि सरकार र सम्बन्धित प्रशासनसित हाम्रो पार्टीले माग गर्दछ ।”

सोमबार साँझ ५ बजेतिर भएको उदयठाँटीको बस दुर्घटनामा भूमिकास्थान नगरपालिकाअन्तर्गत प्रधानमन्त्री रोजगार कार्यक्रमको रोजगार सहायक तारा श्रेष्ठसहित दुई जनाको मृत्यु भएपछि नगरपालिकाले आज मङ्गलबार शोकविदा दिएको थियो ।

खिल्जी र असुरकोटको सङ्गमस्थल उदयठाँटीमा देउसीभैलो नाचिरहेको अवस्थामा अनियन्त्रित ढङ्गबाट आएको बसले ठक्कर दिदा भएको हृदयविदारक घटनामा नगरपालिकाको कर्मचारीसहित भूमिकास्थान–१ निवासी रुनी खनालको पनि मृत्यु भएको थियो ।

घटनामा परी खनालको घटनास्थलमै र श्रेष्ठको उपचारको क्रममा मृत्यु भएको थियो ।

घटनामा परेर ३५ जना घाइते भएका छन् । गम्भीर अवस्थाका १० जनाको बुटवलमा उपचार चलिरहेकोमा १ जना डिस्चार्ज भएका छन् । अन्य २५ जना घाइतेको अर्घाखाँची अस्पतालमा उपचार भइरहेको छ । त्यसमध्ये सात जना डिस्चार्ज भएको प्रहरीले जनाएको छ ।

घटनामा मृत्यु भएका दुई जनाको शव परीक्षणका लागि अर्घाखाँची अस्पतालमा राखिएको छ ।

प्युठानबाट भैलो खेल्ने टोली बोकेर खिल्जी आएको ना३ ख२४७१ नम्बरको बस सोमबार साझ भैलो नाँचिरहेको मेलामै ब्रेक फेल हुँदा अनियन्त्रित भई घटना घटाएको दाबी गरिएको छ ।

घटनापछि बसचालक फरार छन् । ब्रेक फेल भनिए पनि दुर्घटनाको खास कारण पुष्टि हुन बाँकी रहेको र घटनाको अनुसन्धान भइरहेको जिल्ला प्रहरी कार्यालय अर्घाखाँचीले जनाएको छ ।