काठमाडौं । साफ वुमेन्स च्याम्पियनसिप अन्तर्गत कात्तिक १४ गते दशरथ रंगशालामा हुने नेपाल र बंगलादेशबीचको फाइनलका लागि टिकट बिक्री वितरण रोकिएको छ ।
अखिल नेपाल फुटबल संघ (एन्फा) ले सोमबार सूचना प्रकाशित गरी ‘अर्को सूचना जारी नभएसम्मका लागि’ टिकट बिक्री रोकिएको स्पष्ट पारेको छ। स्थगित गरिएको सम्बन्धित सबैको जानकारीको लागि यो सार्वजनिक सूचना जारी गरिएको छ ।
‘कात्तिक ११ गते आइतबार दशरथ रंगशाला त्रिपुरेश्वर, काठमाण्डौंमा साफ वुमेन्स च्याम्पियनसिप–२०२४’ को सेमिफाइनल खेल अन्तर्गत नेपाल र भारतबीचको खेलमा संघसँगको सम्झौताविपरीत रंगशालाको क्षमताभन्दा बढी टिकट बिक्री गरेको कारण उत्पन्न परिस्थितिलाई मध्यनजर गर्दै टिकेटिङ्ग अधिकार प्राप्त माउन्ट एभरेष्ट स्पोर्ट्स एन्ड इभेन्ट्स प्रालिसँग सत्यतथ्य बुझ्ने कार्य भइरहेको’ एन्फाले जनाएको छ।
माउन्ट एभरेष्ट स्पोर्ट्स एन्ड इभेन्ट्स प्रालिले हालकै अवस्थामा कुनै पनि माध्यमबाट टिकट बिक्री नगर्न/नगराउन र अर्को सूचना जारी नभएसम्म नेपाल र बंगलादेशबीचको फाइनल खेलको टिकट खरिद नगर्न हुनसमेत एन्फाले आम दर्शकहरूमा सार्वजनिक आह्वान गरेको छ।
साथै, नेपाल र बंगलादेशबीचको फाइनल खेलको टिकट बिक्री वितरण व्यवस्थित गरी अर्को सूचना मार्फत् जानकारी गराउने एन्फाको भनाई छ।
‘यो सार्वजनिक सूचनालाई वेवास्ता गर्दै टिकट बिक्री वितरण गरी कुनै समस्या आइपरेमा अखिल नेपाल फुटबल संघ जवाफदेही नहुने र त्यसबाट उत्पन्न हुने परिस्थितिका लागि सम्बन्धित पक्ष जिम्मेवार हुने’ एन्फाका प्रवक्ता सुरेश शाहद्वारा जारी सूचनामा उल्लेख छ।
