काठमाडौं । साविक विजेता बंगलादेश साफ महिला च्याम्पियनसिपको आफ्नो पहिलो खेलमा पाकिस्तानसँग बराबरीमा रोकिएको छ।
त्रिपुरेश्वरस्थित दशरथ रगंशालामा आइतबार भएको खेलमा बंगलादेश पाकिस्तानसँग १–१ को बराबरीमा रोकिएको हो।
बंगलादेश र पाकिस्तानको बराबरीले भारत एक खेल अगावै सेमिफाइनलमा पुगेको छ।
बराबरीको नतिजाको बाबजुद पाकिस्तान को सेमिफाइनल पुग्ने सम्भावना जिवित राखेको छ।
पाकिस्तान पहिलो खेलमा भारतसँग ५–२ गोल अन्तरले पराजित भएको थियो। समुह ए को अन्तिम खेलमा बुधबार बंगलादेशले भारतको सामना गर्नेछ।
खेलको इन्ज्युरी समयमा बंगलादेशकी समसुनाहारको गोलमा बंगलादेशले पाकिस्तानसँग अंक खोसेको हो। इन्ज्युरी समयको पहिलो मिनेटमा नै उनले गोल गरेकी थिईन्।
खेलको पहिलो हाफमा जहमिन समिन मलिकको गोलमा पाकिस्तानले सुरुवाती अग्रता बनाएको थियो। खेलको निर्धारित समयमा १–० को अग्रता कायम राखेको पाकिस्तान अन्तिम समयमा सम्हालिन नसक्दा अंक बाँड्न बाध्य भएको हो।
खेलको ३२ औँ मिनेटमा मलिकको गोलमा पाकिस्तानले सुरुवाती अग्रता बनाएको थियो। रमिन फरिदको पासमा जहमिनले गोलरक्षक बिट भएको अवस्थामा दुई डिफेन्डरलाई बिट गर्दै गोल गरेकी थिईन्।
खेलको ७८ औँ मिनेटमा पाकिस्तानकी जहमिना समिन मलिकको पासमा अमिना हामिनले वन भर्सेस वनमा गोल गर्ने सुन्दर मौका खेर फालिन्।
त्यसअघि खेलको ५९ औँ मिनेटमा रितुको प्रहार सेकेण्डबारको नजिकबाट बाहिरिदा बंगलादेशले बराबरीको मौका गुमायो।
४३ औ मिनेटमा रितुको प्रहार क्रसबारमा लाग्दै आकासिदा बंगलादेशले बराबरी गर्ने मौका गुमायो।
नवौँ मिनेटमा बंगलादेशकी रितु पोर्ना चक्माको क्रसमा कोहाती किस्कुको प्रहारले पोष्टको गति लिन सकेन। २० औँ मिनेटमा डिबक्स भित्रबाट सामसुनहाजको प्रहार क्रसबारको माथिबाट आकाशिदा बंगलादेशले अग्रता लिने मौका गुमायो।
२३ औँ मिनेटमा बंगलादेशकी कप्तान सविना खातुनको प्रहार बाहिरियो। २६ औँ मिनेटमा पाकिस्तानकी अमिना हनिफको पासमा सुहा हिरानीको लामो प्रहार बंगलादेशकी गोलरक्षक रुक्मा चक्माको हातमा लाग्दै बाहिरियो।
च्याम्पियनसिपमा भोलि सोमबार दुई खेल हुनेछ। समुह बी को पहिलो खेलमा श्रीलंका र भुटान भिड्नेछन्। खेल त्रिपुरेश्वरस्थित दशरथ रगंशालामा दिउँसो साढे १ बजे सुरु हुनेछ।
दिनको दोस्रो खेलमा घरेलु टोली नेपालले मालदिभ्सविरुद्ध खेल्नेछ। सो खेल साँझ साढे ५ बजे सुरु हुनेछ।
