काठमाडौं । महिला स्वास्थ्य स्वयम्सेविकाले अबदेखि काममा आवतजावत गर्न निःशुल्क सार्वजनिक यातायात चढ्न पाउने भएका छन् ।
२०८१ कात्तिक २ गते शुक्रवार स्वास्थ्य तथा जनसङ्ख्या मन्त्रालयमा एक कार्यक्रमबिच मन्त्रालय र यातायात व्यवसायी राष्ट्रिय महासङ्घमाझ सो सम्झौता भएको हो ।
स्वास्थ्य तथा जनसङ्ख्यामन्त्री प्रदीप पौडेलको सक्रियतामा यातायात व्यवसायीले स्वास्थ्य प्रयोजनका लागि सार्वजनिक यातायातका साधनमा भाडा नलिने सम्झौता गरे ।
सम्झौता कार्यक्रममा बोल्दै मन्त्री पौडेलले स्वास्थ्य स्वयम्सेवीलाई सहज रूपमा काम गर्ने वातावरण बनाउन यो पहलकदमी अघि बढाइएको बताए । उनले यातायातको सुविधा निःशुल्क रूपमा उपलब्ध गराउन सके मात्रै पनि धेरै समस्या समाधान हुने विश्वास व्यक्त गरे ।
उनले सम्झौताको पूर्ण कार्यान्वयन हुनेमा विश्वास व्यक्त गरे ।
उनले भने– ‘उहाँहरूलाई कसरी काम गर्ने वातावरण निर्माण गर्न सकिन्छ ? उहाँहरूको सम्पूर्ण सक्रियताअनुसार उपलब्धि दिने स्थिति कसरी दिन सकिन्छ भनेर मन्त्रालयले छलफल गर्ने सन्दर्भमा हामीले उहाँहरूलाई यातायातको सुविधा निःशुल्क उपलब्ध गराउन सकियो भने उहाँहरूलाई केही हदसम्म राहत हुन सक्छ भन्ने लागेर यातायात व्यवसायी राष्ट्रिय महासङ्घका अध्यक्ष विजयबहादुर स्वाँरज्युलाई सम्पर्क गरेँ । उहाँले हाम्रो प्रश्तावमा सहयोग गर्ने कुरा गर्नुभयो ।’
कार्यक्रममा बोल्दै यातायात व्यवसायी राष्ट्रिय महासङ्घका अध्यक्ष विजयबहादुर स्वाँरले सार्वजनिक यातायातमा स्वास्थ्य स्वयम्मेवीलाई निःशुल्क यातायात चढ्न दिँदा यातायात व्यवसायीको शिर उचो भएको बताए ।
उनले १२ खर्ब बढी लगानी भएको सार्वजनिक यातायातमा १५ लाख प्रत्यक्ष श्रमिकले रोजगार पाएको पनि बताए ।
कार्यक्रममा नेपाल स्वास्थ्य स्वयम्सेवी सङ्घकी अध्यक्ष वसन्ती महर्जनले नेपालभरका महिला स्वास्थ्य स्वयम्सेविकाको लागि आफ्नो जिल्ला जिल्लामा निःशुल्क रूपमा यातायात चढ्न पाउने कुराको सम्झौता हुँदा खुसी लागेको बताइन् ।
उनले लामो समयपछि महिला स्वयम्सेविकालाई बल्ल जग खनेर बसोवास सुरु भएको जस्तो महसुस भएको बताइन् ।
उनले भनिन्– ‘नेपालभरका महिला स्वास्थ्य स्वयम्सेविकाको लागि आफ्नो जिल्ला जिल्लामा निःशुल्क यातायात चढ्न पाउने कुराको सम्झौता हुँदा म धेरै नै खुसी छु । महिला स्वयम्सेविकालाई बल्ल जग खनेर बसोबास सुरु भएको जस्तो महसुस भएको छ ।’
महिला स्वास्थ्य स्वयम्सेविकालाई ५२ हजार महिला स्वास्थ्य स्वयम्सेविकाले जीविकोपार्जन गर्न सक्ने वातावरण बनाइदिन मन्त्री पौडेलसँग आग्रह गरिन् । उनले महिला स्वयम्सेविकालाई खटिएको दिनको दुई हजार रुपैयाँ दिने व्यवस्था गर्न मन्त्री पौडेलसँग माग गरिन् ।
महिला स्वास्थ्य स्वयम्सेविकालाई निःशुल्क सार्वजनिक यातायातको सेवा कार्तिक १५ गतेबाट सुरु हुने छ । सम्झौताबाट अब ५२ हजार महिला स्वास्थ्य स्वयम्सेविका लाभान्वित हुने सरकारको विश्वास छ । यसका लागि महिला सामुदायिक स्वास्थ्य स्वयम्सेविकाको पोशाकमा वा परिचयपत्र बोकेको हुनुपर्ने छ ।
