अर्घाखाँची । अखिल (छैठौं) अर्घाखाँचीको २७ औँ जिल्ला सम्मेलन सम्पन्न भएको छ ।
शनिबार सन्धिखर्कमा सम्पन्न जिल्ला सम्मेलनले प्रकाश चुँदालीको अध्यक्षतामा १७ सदस्यीय जिल्ला समिति चयन गरेको छ ।
नव गठित समितिको उपाध्यक्ष सन्दर्भ खनाल, सचिव कविता राना, सह–सचिव भोजराज खनाल र कोषाध्यक्षमा सुमन पुरी चयन हुनुभएको छ ।
सदस्यहरूमा पूर्णिमा विक, मन्जु पोख्रेल, सन्ध्या राना, मनोज नेपाली, पुजा बरम्ले मगर, आशिष खनाल र करिष्मा नेपाली चयन हुनुभएको छ । त्यस्तै वैकल्पिक सदस्यहरुमा प्रकृती पाण्डे, सुस्मा खनाल र बिपना पोख्रेल रहनु भएको छ ।
२७औं जिल्ला सम्मेलनले पुरन नेपाली, जीवन नेपाली र गोविन्द खत्रीलाई सल्लाहकारमा चयन गरेको छ । भने समितिको पूर्ण, वैकल्पिक र सल्लाहकारमा एक/एक जना सदस्य रिक्त राखिएको अखिल (छैठौं) अर्घाखाँचीले जनाएको छ ।
सम्मेलनको उद्घाटन समारोहलाई सम्बोधन गर्दै अखिल (छैठौं) का केन्द्रीय अध्यक्ष देवेन्द्र कुँवरले देशका ठूला पार्टीका नेताहरू सत्ता मोहमा अल्झिएका कारण मुलुक अहिले पनि कठिन मोडमा रहेको बताउनुभयो ।
सत्तारुढ दलका विद्यार्थी संगठनहरु सत्ता र शक्तिको स्वार्थमा रुमल्लिँदा युवा/विद्यार्थी आन्दोलन समेत कमजोर भएको उहाँको तर्क छ । मुलुकको दिगो विकास र समृद्धिको निम्ति एउटा खबरदारी आन्दोलनको खाँचो औल्याउँदै अध्यक्ष कुँवरले सम्पूर्ण युवा/विद्यार्थिहरुलाई दृढ भएर अघि बढ्न आग्रह गर्नुभयो ।
उद्घाटन कार्यक्रममा अखिल नेपाल महिला संघ महासचिव सकुन्तला राना, नेकपा (मसाल) का जिल्ला प्रवक्ता पशुपति ढकाल, राष्ट्रिय जनमोर्चाका जिल्ला उपाध्यक्ष गोपाल पौडेल, अखिल नेपाल युवक संघका केन्द्रीय सचिव कुलराज खनाल, अखिल (छैठौं)का केन्द्रीय सचिव सरोजमान सिंह र अखिल नेपाल वुद्धिजीवी संघका प्रतिनिधि कमल प्रसाद घिमिरे लगायतले पनि सम्बोधन गर्नुभएको थियो ।
अखिल (छैठौं)का पूर्व जिल्लाअध्यक्ष जीवन नेपालीको अध्यक्षता, प्रकाश चुंदालीको स्वागत मन्तव्य र कविता रानाको सञ्चालनमा उद्घाटन समारोह सम्पन्न भएको थियो ।
जिल्लाका ६ वटै पालिकाबाट प्रतिनिधिहरूको सहभागिता रहेको सम्मेलनमा रक्तिम सांस्कृतिक अभियानका कलाकारहरुले विभिन्न प्रस्तुतिहरू समेत प्रदर्शन गरेका थिए ।
