काठमाडौं । शुक्रबार बिहान बागलुङमा दुर्घटनाग्रस्त जिप रुकुमपूर्वको पुथा उत्तरगंगा गाउँपलिकाको रहेको खुलेको छ ।
बागलुङको गलकोट नगरपालिका–२ भुङ्खानीमा भएको जिप दुर्घटनामा रुकुमपूर्वको पुथा उत्तरगंगा गाउँपालिका उपाध्यक्ष भुपेन्द्रा बुढा, उपाध्यक्ष भुपेन्द्राकी आमा गोपीमाया बुढा र वडा नम्बर २ का अध्यक्ष जस बहादुर श्रीपालीको मृत्यु भएको प्रहरीले जनाएको छ ।
रुकुमुपूर्वका प्रमुख जिल्ला अधिकारी माधव प्रसाद शर्माका अनुसार, तीन जनाकै शव पहिचान भएको हो।
उनीहरू शुक्रबार काठमाडौँबाट रुकुमपूर्वका लागि हिँडेका थिए। सोही क्रममा गलकोट–२ भुङ्खानी भन्ने ठाउँबाट उनीहरू सवार गाडी लगभग ३ सय मिटर तल झरेको थियो।
दुर्घटनामा परेर तीन जनाको घटनास्थलमै ज्यान गएको थियो। गाडीमा जम्मा ४ जना सवार थिए।
चालक २९ वर्षीय प्रेम पुन भने घाइते भएका छन्। उनको धवलागिरी अस्पतालमा उपचार भइरहेको छ।
