भरतपुर । भदौ लागेपछि अन्डाको माग बढेको छ । साउनमा ब्रत बस्ने र चोखो खाने धार्मिक मान्यतालगायतका कारण अन्डा उपभोग घटेकोमा भदौ लागेसँगै माग बढेको व्यवसायीले बताएका छन् ।
दाउन्ने एग्रोफार्म लिमिटेडका कार्यकारी निर्देशक विनोद पोखरेलले भदौ लागेसँगै अन्डाको माग बढेको बताउनुभयो । उहाँका अनुसार माग बढेसँगै फार्महरूले अन्डाको मूल्य बढाएका छन् । वाणिज्य आपूर्ति तथा उपभोक्ता संरक्षण विभागले उत्पादकले मात्रै मूल्य तय गर्न निर्देशन गरेपछि फार्महरूले आफैँ मूल्य निर्धारण गर्ने गरेका छन् ।
पोखरेलका अनुसार २०८१ भदौ ८ गतेदेखि बिक्री मूल्य बढाइएको छ । दाउन्ने एग्रो फार्मले चितवनलाई आधार बनाएर एक्सल अन्डा प्रतिक्रेट (३० ओटाको) रु पाँच सय पाँच तय गरेको छ । ठुलो अन्डा रु चार सय ९५ र मध्यम अन्डाको मूल्य रु चार सय २५ तोकिएको हो ।
हिमचुली पोल्ट्री फार्मका अध्यक्ष राजेन्द्र लामिछानेले आफ्नो फर्मले पनि अन्डाको मूल्य बढाएको बताउनुभयो । उहाँले एक्सेल अन्डाको मूल्य प्रतिक्रेट रु पाँच, ठुलो र मध्यमको रु १० ले बढाइएको बताउनुभयो । सबै फार्महरूले मूल्य बढाएको उहाँले जानकारी दिनुभयो । लामिछानेले भन्नुभयो–’मूल्य बढ्दा पनि लागत मूल्यमा पुग्न अझै सकिएको छैन ।’
अन्डा उत्पादक कृषकहरू नेपाल लेयर्स कुखुरापालक सङ्घ गठन गरेर बजारीकरणमा जुटेका छन् । सङ्घका अध्यक्षसमेत रहनुभएका पोखरेलले ७५ प्रतिशत किसान विस्थापित भइसकेको उल्लेख गर्दै केही किसानहरू फेरि व्यवसायमा फर्किएको बताउनुभयो । साउनमा बिक्री हुन बाँकी अन्डाहरू बिक्री भइसकेकाले अब केही सहज बन्ने पोखरेलको भनाइ छ ।
खिलुङ काली पोल्ट्री फार्मका सञ्चालक भेषराज अर्यालले भदौ लागेसँगै ब्रत सकिएको, पहाडी क्षेत्रका केही भागका सडकमा केही सुधार आएको, चाडपर्व सुरु भएको, विद्यालय, क्याम्पस सञ्चालनमा आएका, पर्यटकको आगमन बढेकाले अन्डाको माग बढेको बताउनुभयो ।
उद्योग सङ्घ चितवनका पूर्व अध्यक्ष पोल्ट्री व्यवसायी त्रिलोचन कँडेलले माग बढेको तर उत्पादन घटेको बताउनुभयो । झन्डै दुई महिना अघि २५ देखि २६ लाख दैनिक अन्डा उत्पादन हुँदै आएकोमा अहिले घटेर २३ देखि २४ लाखमा झरेको उहाँले जानकारी दिनुभयो । केही महिनाअघि विज्ञले अन्डाको लागत मूल्य प्रतिगोटा रु १६ दशमलव ५६ कायम गरेका थिए । (रासस)
