ढाका । बङ्गलादेशमा भारी वर्षापछि आएको बाढीका कारण कम्तीमा १३ जनाको मृत्यु हुनुका साथै ४५ लाख मानिस प्रभावित भएको बिपत् व्यवस्थापन तथा राहत मन्त्रालयले शुक्रबार जनाएको छ ।
ग्लोबल क्लाइमेट रिस्क इन्डेक्सका अनुसार बङ्गलादेश प्रकोप र जलवायु परिवर्तनको सबैभन्दा जोखिममा रहेका देशमध्ये एक हो । करीब एक करोड ७० लाख जनसङ्ख्या भएको दक्षिण एसियाली राष्ट्र बङ्गलादेशका नदीमा पछिल्लो समयमा बारम्बार बाढी आएको छ ।
बिपत् मन्त्रालयको शुक्रबारको बुलेटिनमा प्रभावित तथा मृतकको पुष्टि गरेको हो । बुलेटिनका अनुसार लगभग एक लाख ९० हजार प्रभावितलाई आपतकालीन राहत शिविरमा राखिएको छ ।
बङ्गलादेशका ६४ जिल्लामध्ये ११ जिल्ला बाढीबाट प्रभावित भएको बिपत् मन्त्रालयले जनाएको छ । मन्त्रालयको बुलेटिनमा उल्लेख भएअनुसार चितागङको मुख्य बन्दरगाह सहरबाट करिब एक सय किलोमिटर उत्तरपश्चिममा रहेको फेनी बाढीबाट सबैभन्दा बढी प्रभावित भएको छ ।
बाढीले विनाशकारी अवस्था निम्त्याएको बताउँदै उद्धारकर्मी जाहिद हुसेन भुयाले फेनीमा मानिसलाई बचाउन अथक प्रयास गरिरहेको बताउनुभएको छ । (रासस/एएफपी)
