काठमाडौं । विराटनगरस्थित कोसी अस्पताल कोभिड–१९ उपचार केन्द्रमा उपचार गराइरहेका कोरोनाका बिरामी मध्ये ६ जना निको भएर डिस्चार्ज भएका छन् । कोरोना निको भएपछि ६ जना भारतीयलाई बुधबार बिहानै डिस्चार्ज गरिएको अस्पतालले जनाएको छ ।

यही वैशाख ५ र ६ गते उदयपुरमा संक्रमित फेला परेका १३ जनामध्ये ६ जनाको रिपोर्ट लगातार दुई पटकसम्म नेगेटिभ आएपछि डिस्चार्ज गरिएको हो ।डिस्चार्ज भएकामा ३० वर्षीय अनुस जैदी, २९ वर्षीय मोहम्मद अजिज, २८ वर्षीय मोहम्मद जावेद, २१ वर्षीय मोहम्मद अहमद साहेव, ३४ वर्षीय मोहम्मद अजिरवान र २६ वर्षीय मोहम्मद रासिद छन्।

डिस्चार्ज भएकालाई केही दिन विराटनगरस्थित एक मस्जिदमा बनाइएको क्वारेन्टिनमा राखिनेछ । यो सँगै नेपालमा कोरोना संक्रमणबाट निको हुनेको संख्या २२ पुगेको छ ।

निको भएका तीन जनामा पुनः संक्रमण
यता, कोरोना संक्रमण सञ्चो भएर घर फर्केका तीन जनामा भने पुनः पोजेटिभ पाइएको छ । काठमाडौंका एक जना र बीरगञ्जका दुई जनामा पुनः संक्रमण फेला परेको हो ।

काठमाडौंको सनसिटी अपार्टमेन्टका ५७ वर्षीय पुरुषमा कोरोना संक्रमण देखिएको हो । फलोअप चेकअपका क्रममा जाँच गर्दा पुनः कोरोना पोजेटिभ देखिएको स्वास्थ्य तथा जनसंख्या मन्त्रालय स्रोतले जनाएको छ ।

५ चैतमा बेलायतबाट आएर सनसिटीमा बस्दै आएका उनीसँगै उनकी ८१ वर्षीया आमामा कोरोना संक्रमण भएको १ वैशाखमा पुष्टि भएको थियो । पाटन अस्पतालमा उपचार गरेर आमाछोरा ११ वैशाखमा घर फर्किएका थिए ।

पुनः कोरोना संक्रमण देखिएका उनको पाटन अस्पतालमा उपचार भइरहेको छ।

यस्तै, नारायणी अस्पतालबाट डिस्चार्ज भएका २ जना पुरुषमा पनि पुनः कोरोना पोजेटिभ देखिएको छ । रौतहटका २१ वर्षीय पुरुष र अर्का एक भारतीय नागरिकमा संक्रमण देखिएको हो । वीरगन्जको छपकैयास्थित मस्जिदमा बसेका एक जमाती र भारतबाट फर्किएका रौतहटका युवकमा कोरोना दोहोरिएको स्वास्थ्य तथा जनसंख्या मन्त्रालय स्रोतले जनाएको छ ।

यसअघि क्रमशः चैत ३० र वैशाख १ गते उनीहरूलाई कोरोना संक्रमण रहेको पुष्टि भएको थियो । त्यसपछि वीरगन्जको नारायणी उपक्षेत्रीय अस्पतालमा उपचार गरी निको भयो भनेर वैशाख १४ गते घर पठाइएको थियो ।