काठमाडौं । राष्ट्रिय जनमोर्चाले विदेशस्थित नेपालीहरुलाई प्राथमिकताका आधारमा नेपाल ल्याउन पहल गर्ने सरकारको निर्णयलाई स्वागत गरेको छ । भारतमा रहेका नेपालीलाई स्वदेश ल्याउन प्राथमिकता दिन पनि राजमोले आग्रह गरेको छ ।
पार्टी उपाध्यक्ष एवं प्रवक्ता दुर्गा पौडेलले मंगलबार वक्तव्य प्रकाशित गरी भारतमा सामान्य र निम्न प्रकारका नोकरी गर्ने नेपालीहरुको अवस्था अत्यन्त चिन्ताजनक रहेको भन्दै भारतस्थित नेपाली दूतावास तथा नेपालीहरुका विभिन्न संगठनहरुद्वारा सम्पर्क गरेर कुन ठाउँमा कुन नेपालीहरुको अवस्था अत्यन्त खराब छ ? त्यो छुट्याई प्राथमिकताका आधारमा उनीहरुलाई नेपाल ल्याउन आग्रह गर्नुभएको छ ।
यस्तो छ वक्तव्यः
‘विदेशस्थित नेपालीहरुलाई प्राथमिकताका आधारमा नेपाल ल्याउन पहल गर्ने भन्ने सरकारको अभिव्यक्तिलाई राष्ट्रिय जनमोर्चाले स्वागत गर्दछ । त्यस सन्दर्भमा सर्वप्रथम भारतबाट नेपालीहरुलाई नेपालमा ल्याउने कार्यलाई प्राथमिकता दिनका लागि हामीले सरकारसंग अनुरोध गर्दछौँ ।
भारतमा सामान्य र निम्न प्रकारका नोकरी गर्ने नेपालीहरुको अवस्था अत्यन्त चिन्ताजनक भएको छ । कोरोना भाइरसका कारणले नोकरी छुटेपछि उनीहरुलाई खान र बस्न पनि धेरै मुस्किल परेको छ र त्यसले गर्दा भोकमरीको अवस्था नै उत्पन्न भएको छ । त्यसकारण उनीहरुलाई नेपालमा ल्याउन पहल गर्नुपर्ने आवश्यकतामा हामीले विशेष जोड दिन्छौँ ।
भारतस्थित नेपाली दुतावास तथा नेपालीहरुका विभिन्न संगठनहरुद्वारा सम्पर्क गरेर कुन ठाउँमा कुन नेपालीहरुको अवस्था अत्यन्त खराब छ रु त्यो छुट्याई प्राथमिकताका आधारमा उनीहरुलाई नेपाल ल्याउन ठोस पहलकदमी गर्नुपर्ने आवश्यकतामा हामीले जोड दिन्छौँ । अन्यथा भारतमा भोक र रोगले गर्दा ठूलो संख्यामा नेपालीहरु विरामी हुने वा मृत्यु हुने सम्भावनाप्रति पनि हामीले सरकारको ध्यानाकर्षित गराउन चाहान्छौँ ।’
