महेश रिजाल, भालुबाङ।
‘सबै नेपाली शिक्षक एक होऔं’ भन्ने मूल नाराका साथ अखिल नेपाल शिक्षक संघ दाङ देउखुरीको आठौं जिल्ला परिषद तथा प्रशिक्षण सम्पन्न भएको छ ।
जिल्ला समिति दाङ देउखुरीका अध्यक्ष रुमाल प्रसाद बसेलको अध्यक्षतामा लमहीमा भएको परिषदको उद्घाटन संघका केन्द्रीय सदस्य एवं लुम्बिनी प्रदेशका अध्यक्ष लालबहादुर भण्डारीले गर्नुभयो ।
सहिदप्रति एक मिनेट मौनधारण गरी सुरु भएको परिषदमा शुभकामना मन्तव्य दिँदै भण्डारीले देशका सबै शिक्षकहरु एकजुट भई राज्यका गलत शिक्षा नीतिका विरुद्ध उत्रनुको विकल्प छैन भन्नुभयो ।
कार्यक्रममा विशिष्ट अतिथि अखिल नेपाल युवक संघका पूर्व केन्द्रीय अध्यक्ष काशीनाथ पोख्रेल, राष्ट्रिय जनमोर्चा दाङका अध्यक्ष गणेश आचार्य, अखिल नेपाल शिक्षक संघका केन्द्रीय सदस्य भानु जीएम र अनेशिसंघका पूर्व केन्द्रीय सदस्य कपिलदेव खनाल, अखिल नेपाल युवक संघका केन्द्रीय उपाध्यक्ष एवं जनता मावि कालाकाटेका विव्यस अध्यक्ष चित्रबहादुर महतारा लगायतले शुभकामना मन्तव्य राख्नुभएको थियो ।
अनेशिसंघ दाङका जिल्ला उपाध्यक्ष तुल्सी भण्डारीको स्वागत मन्तव्यबाट सुरु भएको कार्यक्रमको संचालन सचिव ठाकुर खनालले गर्नुभएको थियो ।
सचिव ठाकुर खनालले प्रस्तुत गरेको संगठनात्मक प्रतिवेदन र कोषाध्यक्ष रामकृष्ण पौडेलले प्रस्तुत गरेको आर्थिक प्रतिवेदन पारित भएपछि राष्ट्रिय जनमोर्चा दाङका जिल्ला अध्यक्ष गणेश आचार्य, अखिल नेपाल युवक संघका पूर्व केन्द्रीय अध्यक्ष काशीनाथ पोख्रेल र प्रमुख अतिथि लालबहादुर भण्डारीले शैक्षिक तथा समसामयिक विषयमा प्रशिक्षण दिनुभएको थियो ।
