काठमाडौँ । राष्ट्रिय जनमोर्चाले कम अनुभव, तालिम र अवसरका बाबजुद नेपाली महिला भलिबल टिमको प्रदर्शन सानदार रहेको ठोकुवा गरेको छ ।
२०८१ साउन २३ गते बुधबार काभा भलिबल प्रतियोगितको फाइनलमा पराजय व्यहोरेको सन्दर्भमा राजमोले यस्तो धारणा व्यक्त गरेको हो ।
राजमो उपाध्यक्ष तथा प्रवक्ता दुर्गा पौडेलद्वारा आजै जारी प्रेसवक्तव्यमा अहिलेसम्म नेपाली टोलीले खेलेको सानदार प्रदर्शनका लागि बधाई दिँदै आगामी दिनमा उच्चस्तरको सफलताको कामना गरिएको छ ।
सरकारको तर्फबाट नेपाली खेलाडीलाई कम अवसर उपलब्ध भएको बताउँदै सो वक्तव्यमा खेलकुदको क्षेत्रमा थप बजेट तथा आवश्यक प्रोत्साहन र सहयोग गर्नुपर्ने आवश्यकतामा जोड दिइएको छ ।
यस्तो छ, प्रेसवक्तव्यको पूर्ण पाठ :
“काठमाडौँको राष्ट्रिय खेलकुद परिषद्को कभर्ड हलमा सम्पन्न काभा महिला भलिबल प्रतियोगितामा नेपाली टिमको पराजय भएकोमा दुःख प्रकट गर्दै उनीहरूले अहिलेसम्म खेलेको सानदार प्रदर्शनका लागि उनीहरूलाई बधाई दिन्छौँ र आउने दिनमा उनीहरूको उच्चस्तरको सफलताको कामना गर्दछौँ ।
महिला भलिबल टिमको फाइनलमा हार भए पनि त्यस सन्दर्भमा अर्को महत्त्वपूर्ण पक्ष यो हो कि अहिलेसम्म उनीहरूले श्रीलङ्का, भारत र इरान जस्ता अन्तर्राष्ट्रिय स्तरमा स्थापित टिममाथि विजय प्राप्त गरेका थिए । अन्तर्राष्ट्रिय स्तरमा अत्यन्त तल्लो स्तरमा रहेको, अन्तर्राष्ट्रिय प्रतियोगितामा कम अनुभव प्राप्त र स्वदेशमा समेत कम तालिम र अवसर प्राप्त टोलीले त्यस प्रकारको जुन सफलता प्राप्त गर्यो, त्यो कम महत्त्वपूर्ण कुरा होइन । त्यसैले नेपालको भलिबल टिम अभिनन्दनको पात्र छ ।
यसका लागि हामीले धेरै नै दुःख प्रकट गर्दछौ“ कि नेपालमा खेलाडीको प्रोत्साहन, तालिमसमेतको लागि आवश्यक र उचित अवसर प्राप्त छैन । भलिबल मात्र होइन, नेपालका सबै खेलाडीलाई अन्तर्राष्ट्रिय स्तरका सबै खेलमा सफलतापूर्वक उच्च प्रशिक्षण गर्नका लागि योजना बनाउन उनीहरूलाई अन्तर्राष्ट्रिय स्तरको नै प्रशिक्षण, सुविधा र अवसर प्रदान गर्नुपर्ने आवश्यकता छ ।
नेपालका विभिन्न टिमले अन्तर्राष्ट्रिय स्तरमा गरेको प्रदर्शनबाट उनीहरूमा उच्च स्तरको क्षमता भएको कुरामा कुनै शङ्का रहन्न तर उनीहरूलाई आवश्यक प्रोत्साहन र सहयोग गर्ने विषयमा सरकारको तर्फबाट नै कमी रहेको छ । त्यसकारण त्यसका लागि हामी सरकारले खेलकुदको विकासका लागि पर्याप्त बजेटको व्यवस्था गर्नुपर्ने आवश्यकतामा जोड दिन्छौँ ।
अन्तमा, नेपालको महिला भलिबल टिमले काभा भलिबल प्रतियोगितामा गरेको सानदार प्रदर्शनका लागि उनीहरूलाई बधाई दिँदै उनीहरूप्रति उच्च सम्मान प्रकट गर्दछौँ ।”
