ढाका । बङ्गलादेशका राष्ट्रपतिले नोबेल पुरस्कार विजेता मुहम्मद युनुसलाई अन्तरिम सरकारको नेतृत्व गर्ने गरी जिम्मेवारी तोकिएको घोषणा गर्नुभएको छ ।
राष्ट्रपति मोहम्मद शाहबुद्दिन, सेना, नौसेना र वायुसेनाका प्रमुख र विद्यार्थी नेतासँगको बैठकपछि अगस्त ७, २०२४ का दिन यो निर्णय गरिएको हो ।
बङ्गलादेशी निम्नवर्गको उत्थानका लागि काम गरेका ८४ वर्षीय युनुसलाई अन्तरिम सरकारको नेतृत्व दिन विद्यार्थी नेताहरूले गरेको आह्वानपछि उहाँलाई अन्तरिम सरकारको जिम्मेवारी सुम्पिएको छ ।
“बैठकमा प्रोफेसर डा. मुहम्मद युनुसलाई प्रमुख बनाएर अन्तरिम सरकार गठन गर्ने निर्णय भएको छ” साहाबुद्दिनको कार्यालयले एक विज्ञप्ति जारी गरी जानकारी गराएको छ ।
विज्ञप्तिमा भनिएको छ– “राष्ट्रपतिले जनतालाई राजनीतिक सङ्कटबाट बाहिर निस्कन सहयोग गर्न आग्रह गर्नुभएको छ । देशमा आएको यो सङ्कटलाई पार गर्न अन्तरिम सरकारको द्रुत गठन आवश्यक छ ।”
बैठकमा सहभागी स्टुडेन्ट एगेन्स्ट डिस्क्रिमिनेसन समूहका विद्यार्थी नेता हैदर इस्लामका अनुसार युनुसले सरकारमा प्रमुख सल्लाहकारको जिम्मेवारी पाउनुहुने छ ।
इस्लामले पत्रकारलाई बताएअनुसार शाहबुद्दिनले सकेसम्म कम समयमा अन्तरिम सरकार गठन गर्ने कुरामा सहमति जनाउनुभएको छ ।
हाल युरोपमा रहनुभएका युनुसले मङ्गलबार आफू अन्तरिम सरकारको नेतृत्व गर्न इच्छुक रहेको बताउनुभएको थियो ।
बिहीबार स्वदेश फर्किने
युनुस बिहीबार स्वदेश फर्किनुहुनेभएको छ । बङ्गलादेशमा माइक्रोफाइनान्सका संस्थापक मोहम्मद युनुसलाई अन्तरिम सरकारको नेतृत्व गर्ने प्रस्तावपछि उहाँ बिहीबार ढाका फर्कने कार्यक्रम रहेको उहाँको कार्यालयले जारी गरेको विज्ञप्तिमा उल्लेख छ ।
हाल युरोपमा रहेका ८४ वर्षीय युनुस बिहीबार दिउँसो २ः१० बजे राजधानी ढाका आइपुग्ने उहाँको कार्यालयले जानकारी गराएको हो । (रासस/एएफपी)
