काठमाडौं । नेपालले माल्दिभ्समाथि सोझो सेटमा जित निकाल्दै जारी काभा महिला भलिबल नेसन्स लिगको सेमिफाइनल खेल्ने भएको छ ।
नेपालले अब मंगलबार सेमिफाइनलमा इरानसँग प्रतिष्पर्धा गर्ने भएको हो । पाँच राष्ट्र सहभागी प्रतियोगिताको लिगमा दोस्रो भएपछि नेपालले इरानलाई प्रतिद्वन्द्वी पायो ।
लिगमा पहिलो भएको भारतले भने लिगको चौथो स्थानको श्रीलंका खेल्ने तय भएको छ । चार खेलबाट नेपालले तेस्रो सफलता प्राप्त गरेको हो ।
तीन जित र एक हार सामना गरेको नेपालले ९ अंक जोड्यो । समान खेलबाट भारत १० अंकसहित शिर्ष स्थानमा रह्यो । इरान तेस्रो र श्रीलंका चौथो भयो ।
इरानले सात अंक र इरानले चार अंक बटुल्यो । लिगको अन्तिम खेलमा सोमवार नेपालले प्रतियोगिताकै कमजोर टोली माल्दिभ्सविरुद्ध सहज जित निकाल्यो । नेपालले माल्दिभ्सविरुद्ध पहिलो सेट २५–८ ले एकपक्षीय पा-यो ।
तर दोस्रो सेटमा नेपालका प्रशिक्षक जगदीश भट्टले दोस्रो रोजाइका खेलाडीलाई अवसर दिए । प्लेइङ सेट नै परिवर्तन गरेपछि माल्दिभ्सले नेपालमाथि केही चुनौती दियो । तर सफल हुन सकेन । दोस्रो सेट नेपालले २५–१९ ले आफ्नो बनायो ।
तेस्रो सेटमा पनि माल्दिभ्सले नेपाली टोलीविरुद्ध केही समय दबाब बनायो । तर यो सेट पनि नेपालले २५–१८ ले आफ्नो पक्षमा पार्यो ।
यो नतिजासँगै चारै खेलमा पराजित माल्दिभ्स अंकविहीन भएर प्रतियोगिताबाट बाहिरियो । मंगलवार नै पहिलो सेमिफाइनलमा श्रीलंका र भारतबीच प्रतिस्पर्धा हुँदै छ भने दोस्रो सेमिफाइनलमा नेपालले इरानविरुद्ध चुनौती प्रस्तुत गर्नेछ । नेपालले लिगमा इरानसँगै हार व्यहोरेको थियो ।
आजै भएको पहिलो खेलमा भारतले श्रीलंकालाई २५—१३, २५—२१, २५—२० ले हराएको थियो। तेस्रो जितसँगै भारत १० अंक सहित शिर्षस्थानमा रहन सफल भयो। ९ अंकसहित नेपाल दोस्रो भयो भने श्रीलंका चार अंक जोडेर चौथो हुँदा अंकबिहिन माल्दिभ्स पाँचौ हुँदै लिग चरणबाटै बाहिरियो । आईतवारको कमीकमजोरीलाई सुधार्दै इरानको समाना गर्ने प्रशिक्षक जगदीश भट्ट बताउँछन् ।
नेपाललसँग मंगलबार इरानलाई हराएर बदला लिने अवसर रहेको छ । यसको लागि टिम तयार रहेको कप्तान अरूणा शाहीले बताइन् ।
इरानको युवा टोली भएपनि डिफेन्स र अट्याक निकै मजबुत देखिएको छ । जसलाई तोड्ने रणनीति नेपालले बनाउनुपर्छ साथै नेपालले ब्लक र डिफेन्समा निकै सुधार गर्नुपर्ने देखिएको छ।
भोलि पहिलो सेमिफाइनल खेलमा श्रीलंकाले भारतको सामना गर्नेछ । दोस्रो सेमिफाइनलमा नेपाल र इरानबीच प्रतिष्पर्धा हुनेछ ।
लिग चरणमा इरानसँग भोगेको हारको बदला लिने अवसर नेपाली टिमलाई रहनेछ ।
