नयाँदिल्ली । भारतका पूर्व ब्याट्सम्यान तथा दुइपटक राष्ट्रिय प्रशिक्षक बनेका अंशुमान गायकवाडको ७१ वर्षको उमेरमा निधन भएको छ ।
लामो समयदेखि विभिन्न स्वास्थ्य समस्याका गायकवाडको बुधबार पश्चिमी सहर बरोडामा विविधस्वास्थ्य समस्याका कारण निधन भएको थियो ।
राष्ट्रिय टोलीको चयनकर्ता र प्रशिक्षक बन्नुअघि उहाँले भारतका लागि ४० टेस्ट र १५ एकदिवसीय खेल खेल्नुभएको थियो ।
गायकवाडले सन् १९८२ र सन् १९८३ को शृंखलामा पाकिस्तान विरुद्ध ७० टेस्ट इनिङ्समा एक हजार ९८५ रन बनाउनुभएको थियो ।
भारतीय क्रिकेट कन्ट्रोल बोर्ड (बिसिसिआई) का सचिव जय शाहले पूर्व क्रिकेटर गायकवाडको मृत्युको पुष्टि गर्दै सामाजिक सञ्जालमा लेख्नुभएको छ– ‘अंशुमान गायकवाडको परिवार र साथीहरूप्रति मेरो गहिरो समवेदना छ । यो सम्पूर्ण क्रिकेट जगत्का लागि हृदयविदारक घटना हो ।’
भारतीय प्रधानमन्त्री नरेन्द्र मोदीले पनि क्रिकेटर गायकवाडको निधनप्रति दुःख व्यक्त गर्नुभएको छ ।
प्रधानमन्त्री मोदीले एक्समा लेख्नुभएको छ– ‘उहाँ एक प्रतिभाशाली खेलाडी र उत्कृष्ट प्रशिक्षक हुनुहुन्थ्यो । उहाँको निधनले हामीलाई मर्माहत बनाएको छ । उहाँको परिवार र प्रशंसकहरूप्रति समवेदना व्यक्त गर्दछु ।’
हेल्मेटको प्रयोगबिना र बाउन्सरमा प्रतिबन्ध नहुँदासमेत गायकवाड वेस्ट इन्डिजका तीव्र गतिका बलरको निडरतापूर्वक सामना गर्ने खेलाडीका रूपमा परिचित हुनुहुन्थ्यो ।
माइकल होल्डिङको बाउन्सरले कानमा लागेपछि उहाँको कानको शल्यक्रिया गरिएको थियो । (रासस/एएफपी)
