काठमाडौं । कोरोना भाइरसका कारण खाडी मुलुकमा कार्यरत लाखौं नेपाली श्रमिक स्वदेश फिर्ता हुने तयारीमा छन् । रोजगार गुमाएका कारण ति नेपालीहरु छिट्टै घर फर्कने तयारीमा रहेको श्रम, रोजगार तथा सामाजिक सुरक्षा मन्त्रालयले जनाएको छ ।
कुवेतले ७ हजारदेखि ९ हजार नेपाली कामदार फिर्ता गर्न लागेको मन्त्रालयका अधिकारीहरू बताउँछन् । उनीहरुलाई मध्ये जेठदेखि नेपाल फर्काउन सुरु गरिनेछ । खाडी देशबाट नेपाल फर्कनुपर्ने अवस्थाका कामदारका लागि क्वारन्टिनको व्यवस्था गर्न गृहकार्य अघि बढाइएको श्रम, रोजगार तथा सामाजिक सुरक्षा मन्त्री रामेश्वर राय यादवले जानकारी दिनुभयो ।
खाडी क्षेत्रमा रहेका सबै नेपाली दूतावासहरूलाई रोजगारी गुमाएका वा विभिन्न सङ्कटमा परेका कारण स्वदेश फर्कन चाहेका कामदारको विवरण सङ्कलन गर्न निर्देशन दिइएको मन्त्री यादवले बताउनुभयो ।
यसअघि खाडी देशमा रहेका नेपाली राजदूतहरूले अत्यावश्यक रूपमा नेपाल फर्कनुपर्ने कामदारहरूका लागि तत्कालै क्वारन्टिनको व्यवस्था गर्न परराष्ट्र मन्त्रालयलाई पत्राचार गरेका थिए ।
कुवेत र बहराइनस्थित नेपाली नियोगका अधिकारीहरूले कोरोनाभाइरसका कारण सबैभन्दा बढी साना व्यवसायमा कार्यरत नेपाली श्रमिकहरू प्रभावित भएको र घर फर्कन चाहनेको सङ्ख्या सयौँमा रहेको बताएका छन् ।
कोरोनाभाइरसको सङ्कटका कारण कैयौँ देशमा विशेषगरि साना व्यवसायहरूमा कार्यरत नेपालीहरूले रोजगारी गुमाएका वा उनीहरूका सुविधा कटौती गरिएका विवरणहरू आइरहेका छन् ।
विदेशमा रहेका दशौं लाख नेपाली कामदार स्वदेश फर्काउनु चुनौतीपूर्ण रहेको विज्ञहरु बताउँछन् । श्रम मामिला सम्बन्धी विज्ञ गणेश गुरूङ सबै कामदार ल्याउनुपर्यो भने नेपाल सरकारले नसक्ने बताउनुहुन्छ ।
‘ल्याउनुपर्ने अवस्थामा विभिन्न समूहमा वर्गीकरण गरेर नल्याइ नहुने अवस्थाका कामदारहरू जस्तै कम्पनीबाट निकालिएका र खान बस्न व्यवस्था नभएका अनि राजदूतावासले शरण दिन नसकेकाकालाई सबैभन्दा सुरूमा ल्याउनुपर्छ । बिरामी र गर्भवतीहरूलाई पनि सुरूमा ल्याउनुपर्छ’ गुरुङले भन्नुभयो ।
नेपालबाट श्रम स्वीकृति लिएर वैदेशिक रोजगारीमा ४० लाख कामदार बाहिर गएका छन् । अघिल्लो वर्ष वैदेशिक रोजगारीका निम्ति जानेहरू मध्ये झण्डै ९० प्रतिशत खाडी देशहरूमा गएको यसै वर्ष सार्वजनिक एउटा आँकडाले देखाएको थियो ।
