काठमाडौं । नारायणघाट–मुग्लिन सडकखण्ड अन्तर्गत सिमलतालमा पहिरोले बगाएर त्रिशूलीमा बेपत्ता दुईवटा बस अझै पत्ता लाग्न सेकेको छैन । भारतीय विज्ञ टोलीको सहयोगमा खोजी गर्दासमेत बेपत्ता बस हालसम्म फेला पार्न नसकिएको हो ।
गएको असार २८ गते दुईवटा बस त्रिशूलीमा खसेर बेपत्ता भएका थिए । नेपाल प्रहरी, सशस्त्र प्रहरी र नेपाली सेनाले एक हप्तासम्म बस र कैयौं यात्रु फेला पार्न नसकेपछि सरकारले भारतको सहयोग मागेको थियो । शनिबार आएको भारतीय टोलीले नेपाली सुरक्षाकर्मीसँग मिलेर हिजो (साउन ६ गते) देखि ‘सोनार क्यामरा’सहित खोजीकार्य सुरु गरेको छ ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणले हिजो (आइतबार) सिमलतालदेखि घुमाउनेसम्म करिब ३.५ किलोमिटर र देवघाटदेखि काभ्रेघाटसम्म करिब १० किलोमिटर क्षेत्रमा खोजी कार्य गरेको जनाएको छ।
आज साँझसम्म घुमाउनेदेखि देवघाटसम्म करिब १६ किलोमिटर क्षेत्रमा खोजी कार्य गर्ने योजना रहेको प्राधिकरणले जनाएको छ।
असार २८ गते वीरगञ्जबाट काठमाडौं आउँदै गरेको बाप्र०३००६ख नम्बरको एन्जल डिलक्समा र काठमाडौंबाट गौर जाँदै गरेको प्र३००१ख २४९५ नम्बरको गणपति डिलक्स सिमलतालमा पहिरोमा परी त्रिूशुलीमा खसेका थिए।
एन्जल डिलक्समा २७ जना र गणपतिमा ४१ यात्रु रहेकोमा गणपति बसका तीनजना यात्रु त्रिशूलीमा पौडिएर बाँच्न सफल भएका थिए।
खोजी कार्यमा थप सहयोग गर्न छिमेकी राष्ट्र भारतको राष्ट्रिय आपदा मोचन बल (नेसनल सडजास्टर रेस्पोन्स फोर्स) बाट १२ जनाको एक प्राविधिक टोली नेपाल आएको छ। शनिबार चितवनका प्रमुख जिल्ला अधिकारीको अध्यक्षतामा जिल्ला सुरक्षा समिति चितवन र भारतीय प्राविधिक टोलीको संयुक्त वैठक बसी आइतबार बिहानबाट खोजी कार्य सुरु भएको थियो।
उक्त घटनामा परी हराइरहेका यात्रुमध्ये हालसम्म २५ वटा शव प्राप्त भएको छ। भेटिएका शवमध्ये दुईवटा भारतीय भूमिमा भेटिएका हुन्। हालसम्म १८ वटा शव सनाखत भइ परिवारको जिम्मा लगाइएको छ।
सनाखत भएका शवमा १६ वटा पुरुषको छ भने २ वटा महिलाको छ। त्यस्तै, सनाखत भएका शवमध्ये १३ नेपाली नागरिकका छन् भने ५ वटा भारतीय नागरिकका रहेका छन्।
