टेकराज भुसाल, सन्धिखर्क ।
अर्घाखाँचीको भूमिकास्थान नगरपालिकाका नगरप्रमुख झविलाल थापाले नगरपालिकाको समृद्धिका निम्ति प्रत्येक नागरिक उत्पादनसँग जोडिनुपर्नेमा जोड दिनुभएको छ ।
सन्धिखर्कमा २०८१ साउन ६ गते आइतबार युवाहरूले आयोजना गरेको कार्यक्रमलाई सम्बोधन गर्दै उहाँले यस्तो बताउनुभएको हो ।
यस सन्दर्भमा उहाँले राज्यको गलत नीतिका कारण बढेको युवाहरूको विदेश पलायनलाई रोक्न भूमिकास्थानले कर्मशील जनशक्ति परिचालन कार्यक्रम ल्याएको स्पष्ट पार्नुभयो ।
थापाले भन्नुभयो– ‘सुन्दा सामान्य लागे पनि कर्मशील जनशक्ति परिचालनले नगरपालिकाको बसाइँसराइसमेत कम गर्ने छ ।” “सिमित स्रोत–साधनको अधिकतम उपयोग गरेर उत्पादन, रोजगार र समग्र विकासमा हामी अगाडि बढेका छौँ ।’
नगरपालिकाले गरेका राम्रा काममा खुलेर सहयोग गर्न र सकारात्मक सुझाव दिन थापाले युवाहरूलाई आग्रहसमेत गर्नुभयो ।
समृद्धिका संवाहक युवालाई विदेश पलायन गराउने राज्यको गलत नीतिका विरुद्ध गोलबन्द गर्दै उनीहरूलाई रोजगारीमा जोड्नु अहिलेको मुख्य आवश्यकता भएको थापाको जिकिर थियो ।
भौतिक निर्माणले मात्रै समग्र विकास हुन नसक्ने भन्दै उहाँले पालिकालाई चौतर्फी विकासमा लैजान युवाहरूको सकारात्मक सहयोगको खाँचोमा उहाँले जोड दिनुभयो ।
नगरपालिकालाई राम्रो र अब्वल बनाउन सबैको सकारात्मक भूमिका हुनुपर्ने भन्दै नगरप्रमुख थापाले कमजोरी भए अगाडि उभिएर औल्याउन अपिल पनि गर्नुभयो ।
