काठमाडौँ । सामुदायिक विद्यालयका प्रधानाध्यापको सङ्गठन प्रिन्सिपल एसोसियन अफ नेपाल (पान) ले एसइई (२०८०) को परीक्षामा उत्कृष्ट नतिजा ल्याउने पाँचओटा विद्यालयलाई सम्मान गरेको छ ।
पानले २०८१ असार २९ गते शनिबार एसइई २०८० को नतिजा तथा सुधारका पक्षहरू’ कार्यक्रममा देशभरिमा सबैभन्दा उत्कृष्ट नतिजा प्राप्त गर्न सफल काठमाडौँको विश्व निकेतन मावि र ज्ञानोदय माविलाई र उपत्यकाबाट काठमाडौँको श्रम राष्ट्रिय मावि, ललितपुरको त्रिपद्म मावि र भक्तपुरको मेघा माविलाई सम्मान गरेको हो ।
पानका अध्यक्ष सुदाम गौतमले विद्यालयका प्रधानाध्यापक तथा शिक्षकहरूको मिहेनतका कारण उत्कृष्ट नतिजा ल्याउन सफल भएकाले अब सबै शिक्षकले आफ्नो जिम्मेवारी पूरा गर्नुपर्ने बताए ।
विश्वनिकेतन माविका प्रधानाध्यापक हेरम्बराज कँडेलले नतिजा सुधार गर्नका लागि विद्यालय जिम्मेवार र उत्तरदायी बन्न सक्नुपर्ने बताए ।
छलफल कार्यक्रममा राष्ट्रिय परीक्षा बोर्डका अध्यक्ष महाश्रम शर्माले यसपटकको नतिजालाई हेरेर पालिका तथा विद्यालयले सुधारको लागि काम गर्नुपर्ने बताए ।
पद्मकन्या माविकी प्रधानाध्यापक रीता तिवारीले सामुदायिक विद्यालयको नतिजासँगै अध्ययनरत विद्यार्थीको अवस्था पनि मूल्याङ्कन गरिनुपर्ने बताइन् ।
काठमाडौँ महानगरपालिकाका सहरी विकास योजना सदस्य शैलेन्द्र झा विद्यार्थीलाई सिकाइसँगै पढाइ, उत्तीर्णको महत्वको विषयमा बुझाउनुपर्ने बताए ।
