काठमाडौं । अमेरिकाका पूर्वराष्ट्रपति डोनल्ड ट्रम्पमाथि गोली प्रहार भएको छ। पेन्सल्भिनियामा आयोजित एक र्यालीमा उनीमाथि गोली प्रहार भएको हो ।
उनको कान र अनुहारमा रगत बगेको सो घटनाको भिडिओमा देखिएको छ । घटनालगत्तै ट्रम्पलाई उक्त स्थानबाट बाहिर निकालिएको बीबीसीले जनाएको छ ।
उक्त घटनापछि ट्रम्पले आफ्नो दायाँ कानमा हात राखेको देखिन्छ। गोलीको आवाज आएपछि सुरक्षाकर्मीहरूले ट्रम्पलाई तत्कालै मञ्चबाट निकालेर गाडीतर्फ लगेका थिए।
उक्त र्यालीमा स्थिति नियन्त्रणमा लिनुअघि पटकपटक गोली चलेको आवाज सुनिएको थियो।
त्यस क्रममा ट्रम्पले मुट्ठी उचाल्दै समर्थकहरूप्रति सङ्केत गरेको देखिएको छ।
I fully endorse President Trump and hope for his rapid recovery pic.twitter.com/ZdxkF63EqF
— Elon Musk (@elonmusk) July 13, 2024
ट्रम्पले आफैँले खोलेको सामाजिक सञ्जाल ‘ट्रुथ सोसल’ मा एउटा सन्देश लेख्दै आफू ‘सकुशल रहेको’ र स्थानीय स्वास्थ्य संस्थाले उनको उपचार गरिरहेको जनाएका छन्।
गोलीकाण्डपछि ट्रम्पले सामाजिक सञ्जालमा लेखेका छन्, ‘गड ब्लेस अमेरिका।’
उनले अगाडि लेखेका छन्, ‘मलाई एक गोली लाग्यो, जुन मेरो दाहिने कानको माथिल्ला भागमा लाग्यो। मलाई तुरुन्त थाहा भयो कि केही गडबड भइरहेको छ, किनकि मैले गोलीको आवाज सुनेँ, अनि गोलीले छाला छेडेको महसुस भयो। धेरै रगत बग्यो..।’
उनले आफ्नो र्यालीमा गोली लागेर मारिएका व्यक्तिको परिवारप्रति समवेदना व्यक्त गरेका छन्।
