रामपुर (पाल्पा) । पाल्पा जिल्लालाई पूर्ण खोप सुनिश्चित जिल्ला घोषणा गरिएको छ ।
हरेक वर्ष पूर्ण खोप सुनिश्चित तथा दिगोपना घोषणा गर्ने प्रावधानअनुसार यहाँ १६ महिनादेखि पाँच वर्षमुनिका बालबालिकाले पूर्ण खोप पाएपछि घोषणा गरिएको हो ।
पाल्पाका दशओटै पालिकाले पूर्ण खोप सुनिश्चित तथा दिगोपना घोषणा गरेका छन् । पूर्ण खोप सुनिश्चितका लागि ९५ प्रतिशत सूचकाङ्क पूरा गर्नुपर्ने हुन्छ । जिल्लाका सबै स्थानीय तहले ९५ प्रतिशत सूचकाङ्क पूरा गरेको स्वास्थ्य कार्यालयले जनाएको छ ।
स्थानीय तह र वडासँगको समन्वयमा घरधुरी सर्वेक्षण गरी प्राप्त प्रतिवेदनको आधारमा जिल्लालाई पूर्ण खोप सुनिश्चित तथा दिगोपना घोषणा गरिएको जिल्ला खोप समन्वय समितिका सदस्य सचिव तथा स्वास्थ्य कार्यालयका प्रमुख डा राजेन्द्र गिरीले जानकारी दिनुभयो ।
उहाँका अनुसार दशओटै स्थानीय तहका सबै वडामा घरधुरी सर्वेक्षण गरी जन्मेदेखि १५ महिनामुनिका तीन हजार तीन सय आठ जना बालबालिका र छुट्टै १६ महिनादेखि पाँच वर्षमुनिका दश हजार पाँच सय ६० जना बालबालिकामध्ये सर्वेक्षण गर्दा भेटिएको छ जना बालबालिका ड्रप आउट भएकालाई सबै पूर्ण खोप पाएको सुनिश्चित गरिएको छ ।
गत वैशाख २० गते पूर्वखोला गाउँपालिका, वैशाख २७ गते रिब्दीकोट गाउँपालिका, वैशाख ३१ गते माथागढी गाउँपालिका, जेठ १ गते रैनादेवीछहरा गाउँपालिका, जेठ २ गते तिनाउ गाउँपालिका, जेठ ४ गते रम्भा गाउँपालिका, जेठ ७ गते निस्दी गाउँपालिका, जेठ १४ गते बगनासकाली गाउँपालिका, जेठ २४ गते तानसेन नगरपालिका र जेठ ३० गते रामपुर नगरपालिकालाई पूर्णखोप दिगोपना सुनिश्चित घोषणा गरिएको थियो ।
जिल्लालाई पहिलोपटक २०७० फागुन १३ गते पूर्ण खोप सुनिश्चित घोषणा गरिएको थियो । गत तीन वर्षदेखि जिल्लामा दिगोपना सुनिश्चित घोषणामा निरन्तरता दिइएको छ ।
लुम्बिनी प्रदेशका सभामुख तुलराम घर्तीमगरले खोप समन्वय समितिका संयोजक टङ्कनाथ खनाललाई जिल्ला घोषणाको प्रमाण हस्तान्तरण गर्दै पूर्ण खोप सुनिश्चितता तथा दिगोपना जिल्ला घोषणा गर्नुभएको हो । (रासस)
