नयाँदिल्ली । कोरोना परीक्षणका लागि चीनमा निर्मित आरडीटी किट भारतले प्रयोग गर्न रोकेको छ । आरडीटी किटबाट परीक्षणको नतिजा विश्वसनीय नभएको भन्दै भारतले प्रयोगमा रोक लगाउने निर्णय गरेको हो । भारतीय आर्युविज्ञान अनुसन्धान परिषद् (आईसीएमआर) ले चिनियाँ वन्डफो ब्राण्डका आरडीटी परीक्षणको नतिजा विश्वसनीय नभएको भन्दै प्रयोगमा रोक लगाउने निर्णय गरेको हो।
आईसीएमआरले ग्वान्जाउ वन्डफो बायोटेक र जुहाई लिब्जन ब्राण्डका आरडीटी किटको नतिजाप्रति विभिन्न राज्यहरुमा प्रश्न उठेपछि तिनीहरुको गुणस्तर परीक्षण गरेको थियो । उक्त परीक्षणको नतिजा विश्वसनीय नपाएपछि तिनको प्रयोग तत्काल बन्द गर्न र आपूर्तिकर्तालाई तत्काल फिर्ता गर्न आईसीएमआरले सूचना जारी गरेको छ।
कोभिड १९ को परीक्षणका लागि पीसीआर विधि नै भरपर्दो र उत्तम भएकोले सोही विधि अपनाउन सिफारिस गरिएको छ ।
नेपालमा भने ओम्नी ग्रुपले भित्र्याएको सो किटलाई प्रयोग गर्न सरकारले नै दबाब दिइरहेको छ । विज्ञहरुले आरडीटीको प्रयोग अविश्वसनीय भएको बताइरहेपनि ओम्नी बिजनेस कर्पोरेट इन्टरनेसनल (ओबीसीआई) ले स्वास्थ्य सेवा विभागसँगको सम्झौताभन्दा बढी ल्याएको २५ हजार आरडीटी खरिद गराउन सरकारी निकायहरुबाटै गैर सरकारी संस्थामाथि दबाब दिएको खुलासा भएको छ । उक्त किटको मूल्य करिब तीन करोड रुपैयाँ बराबर छ।
हालै राष्ट्रिय मानवअधिकार आयोगले समेत आरडीटी परीक्षण रोक्न सरकारसँग आग्रह गरेको थियो । यस्तै, स्वास्थ्य क्षेत्रका विज्ञहरुले पनि आरडीटी परीक्षण रोकेर पीसीआर विधि अपनाउन आग्रह गरिरहे पनि सरकारले आरडीटी परीक्षणलाई तिब्रता दिएको छ ।
नेपालमा सोमबारसम्म ५३ हजार ५ सय ३४ जनाको नमुना परीक्षण भएकोमा पीसीआर विधिबाट जम्मा १० हजार ४ सय ७१ र आरडिटी विधिबाट ४३ हजार ८३ जनाको परीक्षण भएको छ ।
चीनमा उत्पादित आरडीटी किटको विश्वसनीयतामाथि भारतमा मात्र नभएर अन्य मुलुकहरुमा पनि प्रश्न उठ्दै आएको छ ।
