बुटवल । लुम्बिनी प्रदेशमा प्रदेशस्तरीय नगर युवा प्रदेशसभा अभ्यास सम्पन्न भएको छ ।
२०८१ जेठ ८ गतेदेखि सुरु भएको संसदीय अभ्यास कार्यक्रम असार ११ गते समापन भएको हो ।
युवालाई देशको संविधान, नियमकानुन, संसदीय व्यवस्थाको अभ्यास र अनुशासन सिकाई भविष्यमा नेतृत्व गर्न सक्षम जनशक्ति उत्पादन गर्नका लागि राष्ट्रिय युवा परिषद्को समन्वय र लुम्बिनी प्रदेश सरकार सामाजिक विकास मन्त्रालयअन्तर्गत प्रदेश युवा परिषद्ले चार दिने नमुना युवा प्रदेशसभा–२०८१ सञ्चालन गरेको हो ।
चार दिनेसम्म चलेको उक्त कार्यक्रम लुम्बिनी प्रदेशका सबै स्थानीय तहको गाउँ/नगरसभाबाट छनोट भएर आएका युवाको प्रतिनिधित्व गर्ने ४३ जना युवामध्येबाट प्रदेश प्रमुख, मुख्यमन्त्री, सभामुख, उपसभामुख विभिन्न मन्त्रालयका मन्त्री सत्तापक्ष र प्रतिपक्षको भूमिकामा रही असार १० देखि प्रदेशसभा सञ्चालन गरेर आर्थिक वर्ष २०८१/८२ को नीति तथा कार्यक्रम, बजेट र विभिन्न विधेयकलाई पास गर्दै लुम्बिनी प्रदेशसभाको डेमो प्रस्तुत गरेका थिए ।
समापन कार्यक्रमलाई सम्बोधन गर्दै युवा परिषद्का उपाध्यक्ष गोविन्दबहादुर खत्रीले युवाको क्षमता र योग्यता पहिचान गरी मेरो देश म बनाउँछु भन्ने उद्देश्यले समृद्ध राष्ट्र निर्माणमा अगाडि बढ्न अनुरोध गरे ।
कार्यक्रममा संवैधानिक पदमा रहेका लुम्बिनी प्रदेश सांसद तथा पूर्व संविधान सभा सदस्य पूर्वमन्त्री इन्द्रजित थारूले लोकतान्त्रिक प्रणाली शासकीय स्वरूप र राज्यसञ्चालनको प्रक्रिया, सरकार निर्माण प्रक्रिया, बजेट निर्माण, प्रदेशसभामा कानुन निर्माणको प्रक्रिया, सभामा पेस, छलफल र पारित, कार्यपालिका, न्यायपालिका र व्यवस्थापिकाबिच अन्तरसम्बन्धलगायतका विषयमा सहजीकरण गरेका थिए ।
सहभागीका अनुसार यस संसदीय अभ्यास कार्यक्रममार्फत राज्य, देशको संविधान, सरकारको प्रशासनिक तथा राजनीतिक र लोकतान्त्रिक प्रणालीका बारेमा विस्तृत ज्ञान लिन पाएको बताएका छन् ।
यससँगै संसदीय अभ्यास गर्दै गर्दा आफूमा क्षमता अभिवृद्धि, भाषणकला, आत्मबल तथा राज्य र राजनीतिक ज्ञानसिपको विकास भएको महसुस भएको बताए ।
युवालाई नमुना युवा प्रदेशसभा अभ्यासका विभिन्न शत्रमा सामाजिक विकास मन्त्रालयका कर्मचारी डम्बर खराल, प्रशिक्षक प्रकाश उपाध्याय, परिषद्का सदस्य रिया बस्नेत र सरोज खनाललगायतले बोल्दै यस्ता कार्यक्रमले, संसदीय प्रणाली, लोकतान्त्रिक मूल्य, संविधानका अन्तरवस्तु, शासकीय प्रणाली, सङ्घीयता र युवाका मुद्दा, सरकारले युवाको नेतृत्व विकास, लोकतान्त्रिक शासन प्रणाली सुशासनसम्बन्धी युवा सशक्तीकरणका लागि सैद्धान्तिक र व्यावहारिक अभ्यासस्वरूप नमुना युवा सांसद अभ्यासको अवधारणा सङ्घीय सरकारले ल्याएको बताउँदै प्रदेश र स्थानीय तहले पनि युवामैत्री नगरको अवधारणासहित यस्ता संसदीय अभ्यास कार्यक्रमको सुरुवात गरेकोप्रति सरकारलाई धन्यवाद दिँदै युवामा उद्यमशीलता र नेतृत्व विकास गरी देशको नेतृत्व लिन सक्ने जनशक्ति उत्पादनमा कार्यक्रमले सहयोग पुग्ने बताए ।
युवा परिषद्को कार्यविधिअनुसार पहिलो चरणमा स्थानीय तहमा नगर/गाउँसभाको अभ्यास गराइन्छ । नगर/गाउँसभाबाट छनौट भएका युवालाई दोस्रो चरणमा प्रदेश नमुना सभामा सहभागी गराइन्छ र प्रदेश युवा छनौट गरी सङ्घमा पठाइने आयोजकले बताए ।
युवालाई व्यवस्थापिका, कार्यपालिका र न्यायपालिकाको कार्य तथा अन्तरसम्बन्धको ज्ञान गराई असल संस्कार र सुझबुझपूर्ण व्यवहार सिकाउनका लागि यस कार्यक्रम सञ्चालन भएको हो ।
