जनकपुरधाम । धनुषामा लकडाउनका क्रममा लागेको हाटबजार बन्द गराउन खोज्दा दुई प्रहरी कुटिएका छन् । बटेश्वर गाउँपालिका १ चित्रपुर स्थित लवकुश चोकमा लागेको बजारमा शुक्रबार प्रहरीका असइ शंकर यादव र हवल्दार नागेन्द्र यादव कुटिएका हुन् ।
प्रहरीले जवर्जस्ती बजार बन्द गराउन खोजेको र ठेलामा जुलेवी बेच्ने एक युवकमाथि कुटपिट गरेपछि त्यहाँ उपस्थित भिडले दुवै प्रहरीमाथि हातपात गरेको स्थानीयले बताएका छन् ।
शुक्रबार दिउँसो सो क्षेत्रमा ब्यापक असिना पानी परेको थियो । सो असिना पानीले पुर्याएको क्षतिबारे प्रहरीलाई जानकारी गराउन बटेश्वर गाउँपालिका वडा नं. १ का वडाध्यक्ष शैलेन्द्र महतोले प्रहरीलाई बोलाएका थिए । त्यसै क्रममा लवकुश बजारमा पुगेपछि बन्द गराउने क्रममा प्रहरी कुटिएका हुन् ।
घटनाबारे जिल्ला प्रहरी कार्यालय धनुषाले अनभिज्ञता प्रकट गरेको छ । यद्यपी जिप्रकाले एक जना प्रहरी निरीक्षकको नेतृत्वमा घटना बुझ्न प्रहरी टोली घटनास्थल पठाएको थियो ।
