काठमाडौं । प्रहरी प्रधान कार्यालयले बढुवा भएका चारजना प्रहरी वरिष्ठ उपरीक्षक (एसएसपी) को बिहीबार पदस्थापन गरेको छ ।
बढुवा भएका एसएसपीहरू क्रमशः श्यामकृष्ण अधिकारी, रवीन्द्र रेग्मी, भीमबहादुर दाहाल र नान्तीराज गुरुङले दर्ज्यानी चिन्हसँगै जिम्मेवारी पनि पाएका हुन्।
प्रहरी प्रधान कार्यालयका अनुसार, अधिकारीको सुदूरपश्चिम प्रदेश प्रहरी कार्यालयअन्तर्गत शान्ति सुरक्षा महाशाखा र रेग्मीको गण्डकी प्रदेश प्रहरी कार्यालयअन्तर्गत शान्ति सुरक्षा महाशाखामा पदस्थापन गरिएको छ।
यस्तै दाहालको कोसी प्रदेश प्रहरी कार्यालयअन्तर्गत अपराध नियन्त्रण तथा अनुसन्धान महाशाखा र गुरुङको राष्ट्रिय प्रहरी प्रशिक्षण प्रतिष्ठानमा काज तोकिएको छ।
सात एसपीको पदस्थापन र काज सरुवा
प्रहरी प्रधान कार्यालयले बिहीबार नै सातजना प्रहरी उपरीक्षक (एसपी) को पदस्थापना तथा काज सरुवा गरेको छ। प्रहरी प्रधान कार्यालयले तीन एसपीको काज सरुवा तथा बढुवा भएका चारजनाको पदस्थापन गरेको हो।
काजीकुमार गुरुङलाई जिल्ला प्रहरी कार्यालय पश्चिम नवलपरासी, हरिहरनाथ योगीलाई मधेश प्रहरी गण जनकपुरधाम र ज्ञानेन्द्र प्रसाद फुयाललाई मानव बेचबिखन अनुसन्धान ब्यूरो मानव बेचबिखन अनुसन्धान शाखामा जिम्मेवारी दिइएको छ।
यस्तै, हालै बढुवा भएका प्रहरी उपरीक्षक प्रदीप बहादुर क्षेत्रीलाई अपराध अनुसन्धान विद्यालय मानव स्रोत व्यवस्थापन शाखा महाराजगञ्ज, नारायण रञ्जितकारलाई नेपाल प्रहरी विद्यालय साँगा काभ्रेपलाञ्चोक, अनन्तराम शर्मालाई राष्ट्रिय सुरक्षा परिषद सिंहदरबार र एकनारायण कोइरालालाई नेपाल प्रहरी विपद व्यवस्थापन कार्य परिचालन शाखा सामाखुशीको जिम्मेवारी दिइएको छ।
