काठमाडौं । नरेन्द्र मोदी तेस्रो कार्यकालका लागि भारतको प्रधानमन्त्रीमा नियुक्त भएका छन्। भारतीय राष्ट्रपति द्रौपदी मुर्मुले शुक्रबार उनलाई प्रधानमन्त्रीमा नियुक्त गरेकी हुन्।
मोदीका अनुसार उनले भोलि आइतबार साँझ ६ बजे शपथ खाने छन् भने त्यसबेलासम्म मन्त्रीहरूको सूची राष्ट्रपतिलाई बुझाउनेछन्।
शुक्रबार बसेको भारतीय जनता पार्टी (भाजपा) नेतृत्वको गठबन्धन एनडीएको बैठकले मोदीलाई संसदीय दलको नेता चयन गरेको थियो। त्यसपछि उनले राष्ट्रपति मुर्मुसमक्ष नयाँ सरकार गठनको दाबी पेस गरेका थिए।
मोदी लगातार तेस्रो कार्यकालका लागि प्रधानमन्त्री बनेका हुन्। उनी पहिलोपटक २०१४ मा प्रधानमन्त्री बनेका थिए। त्यसपछि २०१९ मा प्रधानमन्त्री बने।
अहिले २०२४ मा भएको निर्वाचनमा उनको पार्टी भाजपा नेतृत्वको एनडीए गठबन्धनले बहुमत ल्यायो अर्थात् ५४३ सदस्यीय लोकसभामा २९२ सिट जित्यो। सोही कारण उनी लगातार तेस्रोपटक प्रधानमन्त्री बनेका हुन्।
भाजपा एक्लैले भने यसपटक २४० सिट मात्र जितेको छ। यसअघि मोदी एनडीएबाटै प्रधानमन्त्री बने पनि त्यतिबेला भाजपा एक्लैले बहुमत सिट जितेको थियो।
आइतबार हुने शपथ ग्रहण समारोहमा विभिन्न राष्ट्रका प्रधानमन्त्री तथा राष्ट्र प्रमुखलाई आमन्त्रण गरिएको छ । समारोहमा सहभागी हुन प्रधानमन्त्री पुष्पकमल दाहाल प्रचण्ड भारत जाने कार्यक्रम छ ।
