काठमाडौँ । राष्ट्रिय वाणिज्य बैङ्क लिमिटेड र नेपाल क्लियरिङ हाउस लिमिटेडमाझ अन्तरदेशीय (क्रस बोर्डर) कारोबार गर्नेसम्बन्धी सम्झौता भएको छ ।
राष्ट्रिय वाणिज्य बैङ्कका ग्राहक तथा भारतीय ग्राहकले एक देशबाट अर्को देशमा मोबाइल बैङकिङ तथा क्युआर कोडको माध्यमबाट कारोबार गर्न सक्ने गरी डिजिटल प्रविधिको व्यवस्था मिलाउन ती दुई संस्थाबीच सम्झौता भएको हो ।
यसले नेपालभित्र भारतबाट रकम प्राप्त गर्न सहज हुने बताइएको छ । यस्तो कारोबार नेपाल राष्ट्र बैङ्कले तोकेको सीमा र परिधिभित्र रहेर गर्न सकिने छ । नेपाल क्लियरिङ हाउस (एनसिएचएल) को माध्यमबाट यस्ता कारोबार हुने छन् ।
२०८१ जेठ २५ गते राजधानीमा आयोजित कार्यक्रममा वाणिज्य बैङ्कका प्रमुख कार्यकारी अधिकृत देवेन्द्ररमण खनाल र क्लियरिङ हाउसका प्रमुख कार्यकारी अधिकृत निलेशमान सिंह प्रधानले सम्झौतामा हस्ताक्षर गर्नुभयो ।
सो अवसरमा बैङ्कका उपकार्यकारी अधिकृत देवेशप्रसाद लोहनी तथा दुर्गाकुमारी कँडेल र विभागीय प्रमुख ऋषिराम ढकाल, उपप्रमुख दिनेश ओझा तथा एनसिएचएलको तर्फबाट चिफ अपरेटिङ अफिसर मुन्नि राजभण्डारी र मनिष पटेलको उपस्थिति रहेको थियो ।
हाल वाणिज्य बैङ्कको सातओटै प्रदेशका ७७ जिल्लाका सदरमुकामसहित देशैभर रहेका दुई सय ८७ शाखा कार्यालय, तीन सय पाँच एटिएम, ९९ ओटा शाखारहित बैङकिङ सेवा, ७१ ओटा एक्स्टेन्सन काउन्टर, क्युआर कोड सेवा, प्वाइन्ट अफ सेल सेवा, क्रेडिट कार्ड, डेबिट कार्ड, कनेक्ट आइपिएस, स्मार्ट क्युआर टेलर (बिनाचेक रकम झिक्न सकिने) इन्टरनेट बैङकिङ, परिष्कृत रूको मोबाइल बैङकिङ (डिजिटल संसार) तथा बिनाइन्टरनेट चल्ने युएसएसडी मोबाइल बैङकिङका सेवासमेत सञ्चालनमा रहेका छन् ।
