काठमाडौं । अन्नपूर्ण हिमालको फेदीमा आयोजना हुँदै आएको अन्नपूर्ण म्याराथनको चौथो संस्करण जेठ २१ गते हुने भएको छ । अन्नपूर्णको सफल आरोहणको दिन पारेर यो म्याराथन गरिँदै आएको छ ।

सन् १९५० जुन ३ तारिखका दिन फ्रान्सेली पर्वतारोही मौरिस हर्जोगको टोलीले अन्नपूर्ण प्रथम हिमालको सफल आरोहण गरेका थिए । ८ हजार मिटरभन्दा अग्ला हिमाल आरोहणको इतिहासमा विश्व कीर्तिमानी राखेको सन्दर्भमा उक्त दिनलाई ‘अन्नपूर्ण आरोहण दिवस’ का रूपमा पनि मनाइन्छ ।

सेन्चुरी पर्यटन विकास समिति यो म्याराथनको आयोजक हो । अन्नपूर्ण आधार शिविरको पूर्वाधार विकाससँगै पर्यटन प्रवद्र्धन म्याराथनको मुख्य उद्देश्य भएको आयोजक संस्थाका अध्यक्ष अध्यक्ष एवं अन्नपूर्ण म्याराथन मूल आयोजक समितिका संयोजक ललित गुरूङले बताए ।

‘पर्यटनका लागि सबै मौसम’ भन्ने मूल नाराका साथ २०७५ सालमा पहिलो पटक यो म्याराथन सुरु भएको थियो ।

यो म्याराथन अन्नपूर्ण आधार शिविर अर्थात् ४ हजार १२० मिटरको उचाइबाट सुरु भइ माछापुच्छ्रे आधार शिविर, बगर, देउराली, हिमालय, दोभान, सिनुवा, भनुवा, छोम्रोङ, तउलु, घुर्जुङ, चुइँले, कोम्रोङडाँडा, किम्रोङखोला, उरी हुँदै २ हजार १२ मिटर उचाइमा रहेको घान्द्रुक आइ समापन हुने समितिका महासचिव दिलीप गुरूङले बताए ।

अन्नपूर्ण म्याराथनको पहिलो संस्करणको उपाधि त्रिभुवन आर्मीका हरिकुमार रिमालले जितेका थिए । दोस्रोमा डोटीका खगेन्द्रबहादुर भाटले उपाधि चुमे भने तेस्रो संस्करणको उपाधि जुम्लाका धीरबहादुर बुढा र महिलातर्फ गणना भण्डारीले जितेका थिए ।

महिला तथा पुरुष दुबैतर्फका लागि हुने म्याराथनमा पहिलो, दोश्रो र तेश्रो हुनेले क्रमश ः नगद १ लाख ५० हजार, १ लाख र ७५ हजार रुपैयाँको साथमा मेडल तथा प्रमाणपत्र प्राप्त गर्नेछन् । विदेशीका लागि प्रोत्साहन पुरस्कारस्वरुप विशेष पुरस्काको व्यवस्था गरिएको छ । पुरुषतर्फ दर्ता शुल्क ७ हजार र महिलातर्फ ५ हजार तोकिएको छ ।

महोत्सव सम्पन्न गर्न ४२ सदस्यीय रहेको मूल व्यवस्थापन समिति, १३ वटा विभिन्न उपसमितिसहित सल्लाहकार समिति गठन गरिएको समितिका महासचिव दीलिपले जानकारी दिए ।