अखिल नेपाल किसान महासंघले लकडाउनका कारण कृषि उपज सहज रुपमा बजारमा जान नपाउँदा किसानहरु मर्कामा परेको भन्दै बिक्री वितरणको व्यवस्था मिलाउन सरकारसँग आग्रह गरेको छ । महासंघले प्रेस विज्ञप्ति प्रकाशित गरी कृषिजन्य वस्तुको बिक्री वितरण नहुँदा प्रत्यक्ष रुपमा किसानहरु मर्कामा परेका र ठुलो घाटा व्यहोर्नु परेको भन्दै सरकारको ध्यानाकर्षण गराएको छ ।

अखिल नेपाल किसान महासंघका महासचिव तुलसीराम सापकोटाले प्रेसित गर्नुभएको विज्ञप्तिमा लकडाउनका कारण आफ्नो गन्तव्यमा पुग्न भोकभोकै हिँडेका मानिसहरुलाई जहाँ पुगेका छन्, त्यहीँ खाने बस्ने व्यवस्था गर्न पनि माग गर्नुभएको छ ।

विज्ञप्तिमा भनिएको छः
अहिले विश्वव्यापी रुपमा कोभिड–१९ (कोरोना भाइरस) का कारण विश्व नै आतंकित भईरहेको छ । कोरोना भाइरसको रोकथाम तथा नियन्त्रणका लागि नेपाल सरकारले लकडाउनको घोषणा गरेको छ । लकडाउनका कारण त्यसको प्रत्यक्ष असर नेपाली किसानहरुले उत्पादन गरेका कृषिजन्य वस्तुको बिक्री वितरण नहुँदा प्रत्यक्ष रुपमा किसानहरु मर्कामा परेका छन् । जसका कारण किसानहरुले ठुलो घाटा व्यहोर्नु परेको छ । किसानहरु प्रति भएको असहजता प्रति अखिल नेपाल किसान महासंघको ध्यानाकर्र्षण भएको छ ।

यसै विज्ञप्ति मार्फत अहिलेकोे लकडाउनका कारणले गर्दा किसानले उत्पादन गरेको कृषिजन्य वस्तु बिक्री गर्ने वातवरण सहज बनाउन वा मिलाईदिन अथवा सरकारले आफैँ खरिद गरी किसानलाई सहज वातावरण मिलाईदिन नेपाल सरकारलाई ध्यानाकर्षण गराईन्छ । साथै अहिले लकडाउनले देशको कुना कुनामा रोजी रोटी चलाउनको लागि गएका सबै नेपाली गरिब मजदुरहरु खान नपाई भोक भोकै बाटोमा बिचल्ली भएको समाचार माध्यमबाट आएको हुँदा उनीहरु जुन ठाउँमा छन्, त्यही ठाउँमा खाने बस्ने व्यवस्था मिलाउन नेपाल सरकारको पहिलो दायित्व भएकाले सरकारले छिटो भन्दा छिटो व्यवस्थापन मिलाउन पनि माग गदछौं ।