काठमाडौं । सर्वोच्च अदालतले स्टिङ अपरेशनसम्बन्धि समाचार २४ घण्टा भित्र हटाउन एक समाचार माध्यामलाई आदेश दिएको छ ।
सिधा कुरा डटकमले स्टिङ अपरेशन सम्बन्धि मुद्दा हराउन सर्वोच्च अदालतको न्यायाधीश समेतको मिलेमतो रहेको दाबीसहितको समाचार प्रकाशन गरेपछि अदालतको अवहेलना सम्बन्धि मुद्दा परेको थियो ।
सोही मुद्दाको सोमवार सर्वोच्च अदालतका न्यायाधीशद्वय डा. नहकुल सुवेदी र टेकप्रसाद ढुंगानाको इजलासले सुनुवाई गर्दै युट्युवमा राखिएको सो सम्बन्धि समाचारको भिडियो २४ घण्टाभित्र हटाउन आदेश दिएको हो ।
आदेशमा यस विषयसँग सम्बन्धित अन्य कार्यक्रम पनि उत्पादन, प्रकाशन तथा प्रशारण गर्न पनि सम्पूर्ण सञ्चार माध्यामलाई सचेत गराएको पनि सर्वोच्चका प्रवक्ता वेदप्रसाद उप्रेतीले जानकारी दिए ।
गत वैशाख १४ गते शुक्रवार सिधा कुरा डटकमले सर्वोच्च अदालतको संवैधानिक इजलासमा विचाराधीन रंगेहात घुससम्बन्धि मुद्दा प्रभावित पार्न प्रधानन्यायाधीश, एक न्यायाधीश र केही मिडिया सञ्चालकहरुले बैठक गरेको दाबी सहितको समाचार प्रकाशन गरेको थियो । सर्वोच्च अदालतले सो समाचारले न्याय सम्पादनमा समेत प्रभावित पार्ने भएकाले त्यस्ता समाचार प्रशारण नगर्न सबै सञ्चार माध्यामलाई समेत आदेश दिएको छ ।
सो भ्रामक समाचारले न्याय सम्पादनमा अवरोध पु¥याउने भन्दै सर्वोच्च अदालतका उपरजिष्ट्रार गोविन्द्रप्रसाद घिमिरेले अदालतको अवहेलनामा कारबाही गर्न माग गर्दै प्रतिवेदन पेश गर्नुभएको थियो । सोको सुनुवाई पछि सर्वोच्चले अदालतको अवहेलनामा किन कारबाही गर्न नपर्ने हो, त्यसको आधार र कारण भए यही बैशाख २० गते बिहान १० बजे भित्र अदालतमा उपस्थित हुन पनि सो डटकमका प्रकाशक, कार्यकारी सम्पादकलाई भनेको छ ।
