वेलबारी (मोरङ) । मोरङको बेलबारी नगरपालिका–१ मा सञ्चालन भइरहेको सगरमाथा इङ्ग्लिस स्कुलको उनन्तिसौँ अभिभावक दिवस समारोह सम्पन्न भएको छ ।
बेलबारी नगरपालिकाका प्रमुख दिलप्रसाद राईको प्रमुख आतिथ्यमा २०८१ वैशाख १५ गते शनिबार उक्त कार्यक्रम सम्पन्न भएको हो ।
सो अवसरमा मन्तव्य राख्दै उहाँले शिक्षकहरूले ३६० डिग्री घुमेर व्यावहारिक, व्यावसायिक तथा सिपमूलक शिक्षा प्रदान गरी भविष्यमा गरिखाने दक्ष र स्वाभिमानी नागरिक उत्पादन गर्नुपर्ने आवश्यकतामा जोड दिनुभयो ।
उहाँले भननुभयो– ‘यदि विद्यार्थीलाई सही शिक्षा र सिप सिकाउन नसके भविष्यमा उनीहरूले गरिखाने बन्न नसक्ने र त्यति बेला उनीहरूको भविष्यको जिम्मा अहिलेका शिक्षकहरूले लिनुपर्दछ ।’
अतिथिका रूपमा नेपाली चलचित्र “जारी” लोकप्रिय बनेपछि “मनसरा” चलचित्र निर्माण गरेका निर्देशक तथा लेखक उपेन्द्र सुब्बाले उहिले जस्तो कलाकारहरू बिग्रिएका हुन्छन् भन्ने गलत मान्यता अहिले नभएकाले विद्यार्थीलाई पाठ्यपुस्तकमा मात्र केन्द्रित नगरी चलचित्र, नाटक जस्ता सिर्जनशील क्षेत्रमा पनि समय मिलाएर लाग्न प्रेरित गर्नुपर्ने सुझाव दिनुभयो ।
अर्की अतिथि चलचित्र नायिका मिरुना मगरले विद्यार्थीले प्रस्तुत गरेको नृत्यको प्रशंसा गर्दै विद्यार्थी जीवनमा पढाइलाई बढी जोड दिनुपर्ने कुरामा जोड दिनुभयो ।
कार्यक्रममा युगदर्शन मिडियाका व्यवस्थापक हरिकान्त शर्मा, वडा नं. २ का वडाध्यक्ष कृष्णबहादुर गुरुङ, कार्यपालिका सदस्य सञ्चमाया लिम्बू, बेलबारी नगर प्याब्सनका अध्यक्ष भगवतीप्रसाद घिमिरे, बेलबारी प्रज्ञा–प्रतिष्ठानकी अध्यक्ष रेखा सुवेदीको आतिथ्य रहेको थियो ।
स्कुलका प्रिन्सिपल ईरानराईले विद्यार्थीलाई कृषिकार्यमा सिप सिकाउन १६ कट्ठा जमिन भाडामा लिएको र त्यहाँ काम गरेवापत थोरै थोरै रकम भए पनि कक्षा ११ र १२ का विद्यार्थीलाई पारिश्रमिक प्रदान गरेको तथा हरेक शुक्रबार खाजाको रूपमा फलफूल मात्र खुवाइने जानकारी दिनुभयो ।
कार्यक्रममा विद्यार्थीले गायन, नृत्य, कविता, भाषणकला, कराँते तथा विज्ञान र हस्तकला प्रदर्शनी गरेका थिए ।
सो अवसरमा शैक्षिक सत्र २०८० को वार्षिक परीक्षा तथा अतिरिक्त क्रियाकलापमा प्रथम, द्वितीय र तृतीय स्थान प्राप्त गर्ने विद्यार्थीलाई पुरस्कार प्रदान गरिएको थियो ।
चलचित्र निर्देशक तथा कवि सुब्बा, नायिका मगर, नायक प्रवीण खतिवडा र कलाकार सिजन दाहाललाई दोसल्ला ओढाएर तथा कदरपत्र प्रदान गरेर सम्मान गरिएको उक्त कार्यक्रममा एसइई दिएर बसेका कक्षा १० का ४२ जना विद्यार्थीको संयुक्त निबन्धसङ्ग्रह द एस्से जर्नी सार्वजनिक गरिएको थियो ।
