काठमाडौँ । “मशाल” समूह मोहन वैद्य नेतृत्वको क्रान्तिकारी कम्युनिस्ट पार्टीमा समावेश हुने भएपछि उक्त समूहमा फुट भएको छ ।
अलग हुने समूहले आफूहरू अलग हुनुपर्ने विभिन्न कारणमध्ये “मशाल” समूहसित हुन थालेको पार्टीएकता पनि एक भएको दाबी गरेपछि फुट भएको हो ।
क्रान्तिकारी माओवादीका सचिवालय सदस्यद्वय पूर्णबहादुर सिंह, खेम थपलिया र केन्द्रीय सदस्यहरु हरि श्रेष्ठ, विनोद थापा, अशोक सुवेदी, शम्भु फुयाँल, नवराज भट्ट, बद्री चौलागाई, रणबहादुर विक र केन्द्रीय सल्लाहकार ढुण्डीराज अधिकारीले पार्टीबाट विद्रोह गरेका हुन्।
२०८१ वैशाख १७ गते सोमबार संवाद डबलीमा गरिएको पत्रकार सम्मेलनमा उनीहरूले भनेका छन्– “विश्व साम्राज्यवादले सच्चा कम्युनिस्टमाथि चौतर्फी हमला गरिरहेको सन्दर्भमा सर्वशक्तिमान विचारको उच्चतम चरण माओवादलाई लत्याउँदै महान् जनयुद्धलाई ‘सामाजिक फासिवाद’ र ‘उग्रवामपन्थी भड्काव’ को मिथ्या आरोप लगाउँदै जनयुद्ध कालमा प्रतिकारमा संलग्न गुटसँग गरिएको कथित पार्टीएकता हाम्रा लागि अस्वीकार्य छ ।’
उनीहरुले २०८० वैशाख १८ गते नेकपा बहुमत र नेकपा क्रान्तिकारी माओवादीबीच भएकाे पार्टी एकता भंग भएको घोषणा पनि गरेका छन्।
कार्यक्रममा पार्टीका सचिवालय सदस्य समरजङ्सहित ११ जना नेताहरूको हस्ताक्षर रहेको प्रेसवक्तव्य वितरण गरिएको थियो ।
