काठमाडौँ । लुम्बिनी विकास कोषमा कार्यरत योजना प्रमुख इन्जिनियर सरोज भट्टराई विरुद्ध भ्रष्टाचार मुद्दा दायर भएको छ ।
अख्तियार दुरुपयोग अनुसन्धान आयोगले उनीमाथि २०८० चैत २५ गते आइतबार विशेष अदालतमा भ्रष्टाचार मुद्दा दायर गरेको हो ।
इन्जिनियर भट्टराईले पदीय मर्यादा विपरीतका कार्य गरी गैरकानुनी सम्पत्ति आर्जन गरेको अख्तियारको आरोप छ ।
अनुसन्धानको क्रममा मालपोत कार्यालय, भक्तपुरबाट पत्रसाथ प्राप्त विवरणमा भट्टराईको आमा जनक नन्दनी भट्टराईको नाममा साविक भक्तपुर गुण्डु गाविस–३ स्थित कि.नं. १३७४ र १३७५ क्रमशः २९०२ र ०२१० क्षेत्रफल भएको जग्गा खरिद गरेको पाइएको छ ।
इन्जिनियर भट्टराईले सो जग्गा खरिद गर्नका लागि लुम्बिनी विकास कोषमा ठेक्काको काम गर्ने निर्माण सेवाका प्रोप्राइटरसँग घुस/रिस्वत माग गरेको अख्तियारको ठहर छ ।
भट्टराईले प्रोप्राइटरको बैङ्क खाताबाट जग्गा बिक्रेताको बैङ्क खातामा ४० लाख रुपैयाँ तथा जग्गा खोजी दिने व्यक्तिको बैङ्क खातामा ४० लाख गरी जम्मा ८० लाख रुपैयाँ रकम जम्मा गराएको पाइएको छ ।
भट्टराईले भनेअनुसार जग्गा खोजी दिने व्यक्तिले प्राप्त गरेको ४० लाखमध्ये ३८ लाख सात हजार दुई सय रुपैयाँसमेत जग्गा बिक्रेताको बैङ्क खातामा जम्मा गराएको र जग्गा बिक्रेताले भक्तपुरको गुण्डु ३ स्थित कि.नं. १३७४ र १३७५ को जग्गा बिक्री गरेको देखिन्छ ।
भट्टराईले कोषमा ठेक्का पट्टाको काम गर्ने निर्माण सेवाका प्रोपाइटरसँग घुस/रिस्वतस्वरूप माग गरेको ४० लाख रुपैयाँ रकम आफैले प्रत्यक्ष रूपमा नलिई आमा जनक नन्दनी भट्टराईको नाममा जग्गा खरिद गर्दा उक्त रिस्वत रकम प्रयोग गरी भ्रष्टाचार निवारण ऐन–२०५९ अन्तर्गतको कसुर गरेको अख्तियारको ठहर छ ।
अख्तियारले प्रतिवादी सरोज भट्टराई र उनकी आमा जनक नन्दनीलाई मतियारको रूपमा विशेष अदालतमा आरोपपत्र दायर गरेको अख्तियारका प्रवक्ता नरहरि घिमिरेले जानकारी दिए ।
