काठमाडौँ । कपिलवस्तु जिल्ला अदालतका पूर्वन्यायाधीश भूवन गिरीकी पत्नी आरती रावलले सर्वोच्च अदालतको इजलासमै विषसेवन गरेकी छन् ।
मुद्दाको बहस चल्दाचल्दै आरतीले विषसेवन गरेकी सर्वोच्चका सूचना अधिकारी गोविन्दप्रसाद घिमिरेले जानकारी दिए ।
सर्वोच्च अदालतका न्यायाधीशद्वय हरिप्रसाद फुँयाल र तिलप्रसाद श्रेष्ठको संयुक्त इजलासमा २०८० चैत २१ गते बुधबार मुद्दाको बहस चल्दै गर्दा उनले विषसेवन गरेकी हुन् । उनले आफ्ना पति विरुद्ध वैवाहिक बलात्कारको आरोप लगाएकी छिन् ।
पति गिरी विरुद्ध जिल्ला प्रहरी कार्यालय, कपिलवस्तुमा जाहेरी दिएकी उनले गएको माघ २ गते सर्वोच्चको गेट अगाडि आत्मदाहको कोसिस गरेकी थिइन् । यो मुद्दामा काठमाडौँ जिल्ला अदालतले उनका पतिलाई छोडेको विरोधमा उनले आत्मदाह कोसिस गरेकी हुन् ।
गिरी विरुद्ध कपिलवस्तु जिल्ला अदालतले गत वर्षको चैत २२ गते पक्राउ पुर्जी जारी गरेको थियो । जिल्ला प्रहरी परिसर काठमाडौँले गत चैत २८ गते गिरीलाई पक्राउ गरेको थियो तर अदालतले उनलाई धरौटीमा छोडेको थियो ।
वैशाख १७ गते काठमाडौँ जिल्ला अदालतमा पनि बलात्कारको मुद्दा दायर भयो । जिल्लाले पनि गिरीलाई धरौटीमा छाड्न आदेश दिएको हो ।
उक्त आदेश विरुद्ध उनले उच्च अदालत, पाटनमा पुनरावेदन गरिन् । उच्चले पनि जिल्लाकै आदेश सदर गरेपछि सर्वोच्च पुगेकी आरतीले गिरीलाई थुनामा राखेर मुद्दाको पुर्पक्ष गर्नुपर्ने माग राख्दै आएकी छन् ।
