काठमाडौँ । नेपाल पुलिस क्लब काठमाडौँमा जारी आठौँ आरबिबी एनभिए महिला तथा पुरुष भलिबल च्याम्पियनसिपको पुरुषतर्फको सेमिफाइनलमा प्रवेश गरेको छ।
त्रिपुरेश्वरस्थित राष्ट्रिय खेलकुद परिषद्को कभर्डहलमा बिहीबार भएको तेस्रो क्वार्टरफाइनलमा कोशी प्रदेशलाई सोझो सेटमा हराउँदै पुलिस क्लब सेमिफाइनलमा पुगेको हो ।
एकपक्षीय खेलमा पुलिस क्लबले कोशी प्रदेशमाथि २५–१३, २५–१६ र २५–१३ को सहज जित निकालेको हो ।
प्रतियोगिताको अन्तिम क्वार्टरफाइनलमा अहिले त्रिभुवन आर्मी क्लब र सुदुरपश्चिम प्रदेशबीच खेल भइरहेको छ। यो खेलसँगै पुरुषतर्फको सेमिफाइनल समिकरण पुरा हुने छ।
यसअघि बुधबार भएको खेलमा टिपटप हेल्प नेपाल र गण्डकी प्रदेशले सेमिफाइनलमा स्थान बनाइसकेका छन् ।
महिलातर्फ भने नेपाल पुलिस क्लब र एभरेस्ट भलिबल क्लबले फाइनलमा स्थान पक्का गरिसकेका छन् ।
दुवैतर्फको उपाधि विजेताले ५ लाख तथा उपविजेताले २ लाख रुपैयाँ प्राप्त गर्ने छन् । तेस्रो हुने टोलीले १ लाख २५ हजार रुपैयाँ प्राप्त गर्ने छ।
