काठमाडौँ । राष्ट्रिय जनमोर्चाले बागलुङको निसीखोलामा भएको बस दुर्घटनाप्रति दु:ख प्रकट गरेको छ ।
अध्यक्ष चित्रबहादुर केसीको हस्ताक्षरमा २०८० चैत ६ गते मङ्गलबार प्रेसवक्तव्य जारी गर्दै राजमोले दु:ख व्यक्त गरेको हो ।
वक्तव्यमा मृतकप्रति श्रद्धाञ्जली तथा निजका परिवारलाई क्षतिपूर्ति र घाइतेको तत्काल स्वास्थ्योपचार तथा शीघ्र स्वास्थ्यलाभको कामना व्यक्त गरिएको छ ।
सरकारले कुनै गम्भीर योजना वा पहल नगरेका कारण नेपालमा यातायात दुर्घटना बढ्दै गइरहेको बताउँदै वक्तव्यमा दुर्घटना न्यूनीकरण गर्न गम्भीर ध्यानाकर्षण गराइएको छ ।
यस्तो छ, वक्तव्यको पूर्ण पाठ :
“२०८० चैत ५ गते राती बागलुङ जिल्लाको बुर्तिवाङमा भएको बस दुर्घटनाप्रति दु:ख प्रकट गर्दछौँ । मृतकहरूप्रति हार्दिक श्रद्धाञ्जली अर्पण गर्दै मृतकका शोकसन्तप्त परिवारजनप्रति हार्दिक समवेदना प्रकट गर्दछौँ । घाइतेहरूको शीघ्र स्वास्थ्यलाभको कामना गर्दछौँ । मृतकका घरपरिवारलाई क्षतिपूर्ति तथा घाइतेहरूको शीघ्र स्वास्थ्योपचारका लागि प्रभावकारी कदम उठाउन सरकारसँग माग गर्दछौँ ।
नेपालमा वर्षौँ वर्षदेखि यातायात दुर्घटनाको दर घट्नुको सट्टा झन् झन् बढिरहेको छ । यातायातको क्षेत्रमा हुने गरेका दुर्घटनालाई न्यूनीकरण गर्नका लागि सरकारले कुनै गम्भीर योजना वा पहल गरेको देखिँदैन । त्यसबारेमा लगातार जनस्तरबाट र हाम्रो पार्टीबाट सरकारको ध्यानाकर्षण गराउने काम पनि भइरहेको छ । यो दुर्घटना पनि त्यस क्षेत्रमा सरकारको ध्यान नजानुको नै परिणाम हो । त्यसैले सार्वजनिक यातायातको क्षेत्रमा भइरहेका दुर्घटनालाई न्यूनीकरण गर्न सरकारको गम्भीर ध्यानाकर्षण गर्दछौँ ।”
